Real Madrid captain Nacho chu Saudi Pro League lam nen an indawr mek niin The Athletic chuan a tarlang.
Kum 34 mi Nacho hi Saudi Pro League club Al Ittihad chuan ngawrh takin an dawr a, Nacho hian Real Madrid a chhuahsan a rinawm hle nia report a ni.
Kum 10 a nih lai atangin Nacho hian Real Madrid a zawm, a football career zawng zawng chu Real Madrid-ah a hmang, tun thla tawpah hian Santiago Bernabeu-a a contract a tawp dawn, contract thar ziah a tum tawh lo nia report a ni bawk.
Thla hnih liamta khan Nacho chuan Carlo Ancelotti hnenah, a contract a zawh hnuin Real Madrid chhuahsan a tum thu a lo hrilh tawh nia report a ni bawk.
Nacho hi Euro 2024 khel tur Spain squad-ah a tel ve leh a, Real Madrid chuan contract thar ziahpui tumin hma an la mek bawk.
Kum 2023 khan kum khat dang atan contract a ziak a, Karim Benzema a chhuah avangin Nacho chu Real Madrid captain a ni a, Benzema hi Nacho hian Saudi Arabia lamah a zui lut maithei niin a lang.
Nacho hi Villarreal, Inter leh MLS club te pawhin an ngaihven nia tarlan a ni a, mahse a football career tawp lamah hian sum tamna lam a thlan zawk a rinawm ta hle.