Saudi Arabia player pawimawh an captain ni lai Salman Al Faraj hian Agentina an hmachhawn tumin a inhliam a, hemi avang hian World Cup chhung zawng a chawlh a ngai tawh dawn a ni.

Argentina leh Saudi Arabia te hi November ni 22 khan an inkhel a, he inkhelah hian Saudi Arabia hian khawvel barakhaihin Argentina 2-1 in an hneh a nih kha. Nimahsela, an captain Al Faraj chu first-half tawp hma 45+4 mins ah a kea hliam a neih avangin lakchhuah a ngai.

Saudi Arabia defender leh an captain ni bawk Al Faraj hian group stage a Poland 2-0 a an hneh loh tum pawh khan a inlan tawh lo a, tunah chuan group stage hi lo tlang ta tehreng pawh nise kan hmuh chhawnzawm tawh dawn lo tih Saudi Arabia chuan nimin Pathianni khan an sawi.

Kum 33 a upa captain hian Saudi Arabia tan vawi 71 a inlan tawh a, Saudi Arabia lama an league lamah kum 2008 atanga tun thlengin Al Hilal tan a khel mek a ni.  

Saudi Arabia hian an captain bakah hian an defender tho Yasser Al Shahrani pawh Argentina an hmachhawn tum bawk hian anmahni goalkeeper Mohammad Al Owais chuan a khupa a do fuh palh avangin a inhliam ve mek bawk.

Herve Renard leh a naute hi Group C ah awmin, pathumnaah point 3 hmuin an awm mek a, Mexico an la hmabak. Round of 16 lut tur chuan chak an mamawh dawn a, match dangah Poland hian Argentina an hneh a nih erawh chuan in-draw ringawt pawh a tawk viau dawn a, mahse, chutiang a nih loha Argentina hian Poland an hneh a nih erawh chuan point 1 ngawt chu a tawk dawn lo, chak ngei ngei an ngai dawn a ni.