Chelsea captain hlui John Terry chuan Steven Gerrard-a hnung zuiin Saudi Arabia lam a pan ve dawn niin a lang a, Saudi Pro League club Al-Shabab chuan Terry hi lak an tum.

Sports Zone-in a tarlan danin, Al-Shabab hian Terry hi an sporting director turin an bia a, inremna pawh an nei hnai nia tarlan a ni a, England captain hlui hi Middle East lamah a kal lovang tih a sawi theih loh.

Kum 42 mi hian inkhelh a chawlhsan hnuah mamagement a luhchilh a, Aston Villa ah leh Leicester City-ah te assistant manager angin a awm tawh a, tunah hian Chelsea academy lam a enkawl mek a ni.

Al Shabab hi tun season-ah an che tha lova, table mawng lamah awmin, game 7 atangin point 8 bak an la hlawhchhuak lova, tun kar tawp hian Saudi Pro League club lian Al Hilal nen an inhmachhawn dawn.

Kan hriat theuh angin kuminah Saudi club te an che na hle a, Europe atangin player tha tak tak an lalut hnem tawh hle a, player lakluh duh tawk lovin manager lam pawh an lalut a, Al Ettifaq chuan an manager atan Liverpool captain hlui Steven Gerrard an lalut a ni.