Erik ten Hag leh Jadon Sancho te inkar buaina chuan media a luah chhunzawm zel a. Manchester United player thenkhat chuan Sancho hi an pu hnenah ngaihdam dil turin an ti ve mek niin English media te chuan an tarlang.
Training-naa a performance avangin Erik ten Hag chuan Nottingham Forest an hmachhawn dawn khan a drop a nih kha. Khata tang khan Sancho chu United squad-ah a la tel leh lo.
Social media lamah Sancho chuan chhuanlam atana amah chu an hman bik thin thu a sawi. Erik ten Hag a lawm lo hle a, ngaihdam dil turin a ti, Sancho chuan a post kha a delete tawh a, mahse ngaihdam erawh a la dil lo thung.
English midfielder hi amaha training tir a ni a, Greenwood an thehchhuak, Mason Mount a inhliam, Antony pawh thubuai a neih avangin Old Trafford-ah a la kir leh lo. Player indaih lo viau mah se Ten Hag chuan Sancho a ko duh thak lo.
Sancho hian ngaihdam a dil lo a nih chuan, January transfer window inhawn hunah man tlawm zawka United-in hralh an tum niin thu a thang mek bawk.
Manchester City academy-a a awm lai atang tawhin Sancho hi training-naah a tlai thin nia sawi a ni a. Borussia Dortmund-ah pawh khan training a tlai thin avangin pawisa a chawi nual nia sawi a ni bawk.
Carrington training ground-ah pawh a tlai fo nia sawi a ni a, Erik ten Hag chuan discipline khawng taka kenkawh a duh avangin Sancho hi a hrem ta nia report a ni.
English winger hian Dortmund tan khan ropui takin a khel, game 137 atangin goal 50 a khung a, assist vawi 64 a nei. Manchester United-ah erawh game 82 atangin goal 12 a khung a, assist vawi 6 chiah a la nei.
A duhna position-ah a khel thei lo niin Solskjaer khan a lo sawi tawh a. Rashford-a awmna hi Sancho-a khelh duhna hmun a ni a, mahse Rashford erawh a nek chhuak zo si lo a ni.
A performance hi nasa takin a tlahniam, player pakhat pawh a bum tlang thei tawh lo. Tin, a discipline a tha tawk lo bawk niin media te chuan a sawi mek bawk a. United hian January transfer window inhawn hunah an thehchhuah mai ring an tam hle.
Sancho hian amahin training nei mah se, United dinning hall-ah erawh player dang te nen chaw an ei ho thin tho a. Hetah hian United player thenkhat te chuan an pu hnena ngaihdam dil turin an nawr.
Tin, PFA lam pawhin Sancho leh Ten Hag-a inkar chinfel a nih theih nan hma lak an tum niin Daily Mail chuan a tarlang bawk a.
Dutch coach hian Old trafford a pan tirh khan, United hotute chuan player te nungchang a that loh avangin khawng taka team enkawl turin an ti a. Rashford pawh team meeting a tlai avangin Ten Hag chuan a drop hmak a nih kha.
Tin, Cristiano Ronaldo pawh nikum December thla khan a contract an tihtawp sak bawk a. Hetianga khawng taka team a enkawl avang hian team tha tak a nei chho thei dawn nge dawn lo tih erawh kan la hre chiah thei bik lo a ni.