Spain coach Luis Enrique chuan Round of 16 an luh avangin lawmna vak tur a hre lo tih a sawi.

La Rojas hian Ningani zan khan Japan an ngam lova, Khalifa International Stadium-ah 2-1 in an hneh lo. Second half tir lamah chanchin duhawm loh tak an hria a, inkhel dangah Costa Rica chuan Germany lakah 2-1 in hma an hruai.

Costa Rica hi chak se chuan point khatin an tla thei a, Germany hian 4-2 in an hneh ta thung.

Inkhel zawh hnua an kawmnaah Enrique chuan, "Knockout round kan luh avangin ka lawm viau hran lo. Group hmahruaitu niin a tawp khar ka duh a, kan chetsual avangin pawi ka ti khawp mai. Japan khan minute nga chhungin vawi hnih an pet goal a, tih theih reng kan nei lo.

"First half-ah goal hlauhawm tia sawi tur pakhat mah kan nei lova, chawlhlaw laiin ka zilh nasa hle. Second half-ah pawh danglamna hmuh tur a tam lova, Japan hmaah kan tlu ani ber mai. Chak lo chungin kan him hram a, hei vang hian lawmna vak tur ka hre lo." tiin a sawi.

Ningani zana an hnehloh Japan hian Group E-ah hma an hruai a, a mawngphahah Germany an awm. Karleh Thawhlehni zan hian Morocco an hmachhawn leh dawn a, Japan hian Thawhtanni zanah Croatia an tum ve dawn bawk a ni.