Ronaldo-a tan hian thil a kaltluang lo chho zel em ni? Manchester United atanga chhuahtir a ni chauh a, National team-a a captain ban hren chan mai thei dinhmunah a ding leh tawh.

South Korea an hmachhawn tum khan lakchhuah niin, khatah khan a lungawi lohna a lantir dan vang khan Portugal manager Fernando Santos chuan  captain-a a hman tur chuangchang a sawi chiang thei lo.

South Korea-in Portugal laka 2-1-a hnehna an chan tumin Ronaldo chu lakchhuah a ni a, khelmual a chhuahsan dawn hian thinrim hmel pu chungin an khingpuite chu ngawi turin zaizirin a ti. He thil chungchangah hian Santos chu a lawm vak lo niin a lang.

Press conference-ah Santos chuan, "Kha thil kha ka duh lo khawp mai, ka lawm lo. Mahse chinfel vek a ni tawh. Sawi zui tur a awm tawh lo, tunah chuan kan match dawt leh atana insawrbing kan ngai," tiin a sawi.

Ronaldo chu team captain a la ni chhunzawm zel dawn em? tih zawhna chu, "Stadium kan thlen hnuah chauh captain tur hi ka thlang. Tunah pawh line-up tur hi ka la chiang lo.

"Chu chu ka tih dan fo a ni a, ka ti zel dawn bawk. Thu dangah chuan thuthlukna siam a ni tawh," tiin Santos chuan a chhang. Ronaldo-a dinhmun tur hi chu a sawi chiang duh lem lo a ni.

He thilthleng chungchangah hian Ronaldo chu a insawifiah ve bawk. Kha chetzia kha an manager vang ni lovin an tumpui vanga tilang zawk a nih thu a sawi.

"Ka chhuah hma khan lehlam player pakhat khan chhuak vat vat turin min lo hrilh a, ngawi turin ka ti a nih kha. Thuneihna a nei lo, a sawi ve tur engmah a awm lo," tiin Ronaldo chuan a sawi.

Zanin hian Portugal chuan Round of 16 match-ah Switzerland an hmachhawn dawn, an chak a nih chuan Spain leh Morocco chak zawk zawk an hmachhawn thei ang.