Inrinni zan khan Portugal chuan World Cup qualification UEFA Round 1-ah Armenia an tlawh a, 5-0 laiin mikhual Portugal chuan hnehna an chang a, Cristiano Ronaldo leh Joao Felix ten goal hnih ve ve an khung a, Cancelo chuan goal 1 a khung ve bawk.

Goal hmasa ber hi Felix-a khung a ni a, Joao Cancelo ball vawrh chu Felix hian minute 10 lekah a tauh goal. Minute 21-ah mual dinglam sir atanga Pedro Neto cross chu Ronaldo chuan mawi lutukin defender kar atanga put chhuakin a tlawh goal.

Darkar chanve an khelh tlin hnu lawkah Cancelo chuan nuai nuai nuai karah a chhuih goal a, half time a nih chuan 3-0 in Portugal chuan hma an hruai.

Second half tan a ni chiah tihin Cristiano Ronaldo chuan box pawn pen 25 vel atangin kawh lutukin a chhuih goal a, ram tan goal 140 a khung tling a, career goal 942 lai a khung tling ta bawk.

Goal a khung hnu deuh lawkah Ronaldo lakchhuah a ni a, Goncalo Ramos chuan a rawn thlak. Minute 60 an khel tling vel tihin Felix chuan a goal hnihna leh he match-a goal hnuhnung ber a khung a, 5-0 laiin Portugal chuan hnehna an chang ta a ni.

Kumin chhung hian Cristiano Ronaldo hian competition hrang hrangah goal 20 chuang a khung ta a ni. Al Nassr tan Ronaldo hian game 105 a khel tawh a, goal 93 a khung tling tawh bawk a ni.

Ronaldo hian career goal 1000 khung tlin a tum a, kum 40 mi hian goal 942 a khung tling tawh a, goal 1000 khung tlin nan goal 58 a la mamawh a ni.

2026 World Cup hi Ronaldo hian a khel thei dawn nge dawn lo a la sawi theih loh a, Portugal coach hian captain atan a la ruat mek a, tunah hian kum 40 a ni tawh bawk nen, nakkum lamah chuan kum 41 a ni tawh dawn a, World Cup khelh a la tum hle niin a lang mek.