Cristiano Ronaldo hian Germany hi vawi 5 a lo hmachhawn tawh a, vawi 5 an tlawm. Portugal-in Germany an hneh hnuhnun ber chu Euro 2000 kha a ni daih tawh a, nilaini zan khan Portugal chuan 2-1 in Germany an hneh ve ta a ni.
Munich-a Nations League semi-final match-ah Germany chuan Wirtz hmangin goal khung hmasa mah se, Conceicao chuan Portugal siphurh a rul a, Cristiano Ronaldo chuan chakna goal a khung a, 2-1 a hnehna changin, final an lut ta a ni.
Second half minute 48-ah Kimmich-a ball chip tha lutuk chu Wirtz chuan bottom corner-ah a tauh goal. Minute 63-ah Conceicao chuan ball chak taka tlanpuiin, box dinglam atang chuan a ke veilamin a chhuih goal mawi hle.
Minute 68 a ni a, mual veilam sir atanga Nuno Mendes-a cross chu kum 40 mi Cristiano Ronaldo chuan awlsam takin a chhuih goal a, he goal hi Portugal chakna a ni chhunzawm ta a ni.
Ronaldo hi ram tan vawi 220 a inlan ta a, ram tan goal 137 a khung tling ta. Tin, career goal 937 a nei tling ta bawk a, goal 1000 khung tlin tumin hma a la mek a, kumin chhungin goal a khung leh ta nual mai le.
Engtin nge Ronaldo a awm zel dawn?
Nakkum World Cup hi a khel dawn em? Hei hi zawhna chhan harsa tak a ni. Kum 40 mi a ni tawh a, Saudi Pro League lamah a khel bawk. Heti chung hian international match lamah Portugal player pawimawh a la ni thei zel hi a mak a ni.
Kum 2 leh a chanve liamta chhung khan Saudi club Al-Nassr tan a khel a, tun nipuiah hian a contract a zo dawn. League game hnuhnung ber an khelh zawh khan Ronaldo chuan, "Thawnthu bung chu a zo ta a, chutihlaiin bung thar ziah a ni zel dawn," tiin social media-ah a tarlang a nih kha.
Kha avang khan mi tam takin Al-Nassr a chhuahsan dawn niin an ngai hman. Club World Cup khel a ni dawn, Fifa president Gianni Infantino chuan Ronaldo chu inlan ve ngei se a duh a, a chungchang pawh an sawi ho nghe nghe niin a sawi.
Al-Nassr chuan Club World Cup an khel ve dawn si lo a, Brazil club Botafogo nen sawi zawm an ni. Chutih laiin Al-Nassr nen indawrna tha tak an neih hnuah Ronaldo chuan kum 2 dang atan contract thar a ziak leh dawn niin media hrang hrangin an tarlang mek.
Ronaldo hian goal 1000 a khung thei ang em?
Goal 1000 khung turin Ronaldo hian goal 63 a la mamawh. Goal 1000 a khung tling a nih ngat chuan, record thar a siam leh dawn tihna a ni.
Brazil legends Pele leh Romario te khan goal 1000 an khung niin an inchhal. hetih lai hian official match ni loa goal te an lo chhiar tel nia tarlan a ni a, kha avang khan goal 1000 khung tling anga tarlan an ni lo.
Ronaldo hian season hnih liamta chhung khan Al-Nassr tan goal 35 a khung a, kum 2 dang contract ziak leh ta se, a tum ram hi a thleng thei ang em?