English striker Tammy Abraham chuan Chelsea chhuahsana AS Roma a zawm chhan bulpui ber chu an manager Jose Mourinho vang a nih thu a sawi.

Nipui bazar lai khan Roma chuan Abraham hi Mourinho club hlui Chelsea atangin an lei a, a manah pound maktaduai 34 vel sengin, kum nga daih contract an ziahpui.

Abraham an lei hi Roma hian an tifuh dawn hle niin a langa, kum 24 mi hian Roma tan game 10 khel tawhin goal 4 a khung tawh a, tlarhma lama Roma player pawimawh ber zinga mi a ni chho nghal.

Abraham chuan, “Kal theihna dang pawh ka nei nual a, club tam tak nen a hunlai khan kan indawr. Italy lam an rawn langa, Jose nen kan inbia a, thil tum felfai tak a nei tih ka hrethiam.

“Roma hi hruai thlen duhna a nei a, an lakah rinna a nei nghet em em a, chumiah chuan tel ve kha ka chak a ni. Ka chungah pawh rinna a nghat takzet a, Jose hi Roma ka zawm chhan lian tak a ni,” tiin Italy lam a pan chhan a sawi.

“Italy lam hian a tirah khan ka rilru an luah vak lova, Premier League-a awm kha ka duhdan tak chu a ni. Premier League hi ka in ang a ni a, mahse a hnuah ka rilru ka hawng zau ta a, thutlukna siamin Italy ka thlang a, ti nawn leh pawh ni ila ka thutlukna hi ka thlak lovang.

“Roma ka zawm hnu hian tactical lam zawngah thil tam tak ka zir thar tawh a, ka dam chhunga ka zir aia tam ka zir tawh. Manager hrang hrang hnen atanga inzir hi a tha a, tunah keipawh tam tak ka zir belh mek a ni,” tiin Abraham chuan a sawi belh bawk.