AS Roma chuan Liverpool left-back Kostas Tsimikas chu an dawr mek a, Italian club hian season tluana loan-a hawh an duh.

Liverpool erawh chuan Greece international hi hralh an duh a, Bournemouth aṭanga Milos Kerkez an lak luh tawh avangin Tsimikas hi mamawh tawh lo niin an inngai.

Thawhṭanni zana Newcastle United an hmachhawn ṭum pawh khan Tsimikas hi Liverpool squad-ah telh a ni ve tawh lo. Slot chuan veilam tlarhnungah Kerkez a chhawr a, Andy Robertson chu Kerkez-a thachhang dawltu a ni chho dawn niin a lang a, hei vang hian Tsimikas-a tan Liverpool-ah hmun a awm ta lo a ni.

Tun nipui bazar inhawn lai ngei hian Liverpool chuan Tsimikas hi hralh an duh a, kum 29 mi hian England a chhuahsan a nih chuan, European Football khelh theihna tur leh, inkhelhna hmun a chan tam theihna tur lam pan a duh dawn nia report a ni.

Greece International hian kum 2020 khan Olympiacos aṭangin Liverpool a zawm a, kum 2023 khan contract thar ziak lehin, tuna a contract hian kum 2027 thleng a daih.

Liverpool tan Tsimikas hian game 115 a khel ve tawh a, assist vawi 18 a nei tawh bawk. Anfield-a kum 5 a awm chhungin Robertson-a thachhang dawltu a ni a, Kerkez an lak luh hnu hi chuan 3rd choice a ni ta a ni.

Tun nipui bazarah hian Liverpool chuan player an la lut nual. Kerkez, Florian Wirtz, Jermine Frimping, Hugo Ekitike, Freddie Woodman leh Armin Pecsi te an la lut.

Liverpool hian player an thehchhuak nual bawk a, Darwin Nunez, Luis Diaz, Jarell Quansah, Trent Alexander-Arnold leh Caoimhin Kelleher te an hralh tawh a ni.