Manchester City manager Pep Guardiola chuan a midfielder Rodri chu Ballon d'Or dawn phu ber niin a ngai.

Kum 2006 atang khan Lionel Messi leh Cristiano Ronaldo te chuan Ballon d'Or hi an indawn chhawk a ni ber a, tunah chuan anni pahnih an awm tawh lo, Ballon d'Or dawng tur pawh rin thiam a har ta nak mai.

2024 Ballon d'Or ceremony neih a nih hma zawngin Real Madrid forward Vinicius Jr. chu dawng tura media te rinkai ber a ni a, mahse a dawn tak takah erawh Rodri hming a langsar ta ber.

Vini Jr. hi Ballon d'Or ceremony neihna Paris-ah a kal dawn lo niin Marca chuan a tarlang a, Real Madrid player leh coach te pawh an kal dawn lo niin Marca chuan a tarlang bawk.

Hetih lai hian Rodri erawh Paris-ah hmuh a ni a, City midfielder hian Ballon d'Or a dawn a rinawm ta hle.

"Rodri hian Ballon d'Or dawn a phu, a chhan chu player tha ber a ni miau a. Ballon d'Or hi Messi leh Cristiano te ta a ni thin a, tunah chuan an lo upa ve ta, Messi pawh a che ropui tawh lo.

"Ka thutlukna ni selang chuan Rodri hi ka dawntir ang. Chutih laiin dawng thei tur player tha tak tak erawh an awm nawk mai," tiin Pep Guardiola chuan a sawi.