Rodri inhliam chu Manchester City tan a pawi vawng vawng. Pep Guardiola pawhin Rodri thlaktu tur midang an awm loh thu a sawi chhuak hial.

Pathianni zana Arsenal nen 2-2 a an inhnehtawk tum khan Rodri hian a khup a tihliam. Zai a ngai dawn a, engtia rei nge a chawlh dawn tih hriat loh mah se, a chawl rei dawn tih erawh a chiang.

"A chawlh hun chhung tur kan la sawi thei lo, mahse a chawl rei dawn a ni. Kan beisei aia hmain lo kir leh se ka duh.

"Tunah hian doctor te thu leh hla kan ngaichang mek a, zai a ni ang a, engtiang chiahin nge an enkawl dawn tih kan la hre bik lo a ni.

"Kan duh loh thil kan tawng, chutih laiin season tha takin kan hmang chho mek tho. Ka player dang te ka ringtawk em em a, Rodri tel loa khelh dan kan ngaihtuah a ngai dawn a ni.

"Rodri hi thlak theih a ni lo a, khawvela midfielder tha ber tel lo hian kan game pawh a buai. Kan tan chuan channa nasa tak a ni chiang mai.

"Chutih laiin hei hi football a ni a, thleng thei lo a awm lo. Ka hna chu Rodri tel loa tha taka khelh theih dan ruahman a ni," tiin Man City boss Pep Guardiola chuan a sawi.

Arsenal an hmachhawn tum khan Rodri hi Mateo Kovacic chuan a rawn thlak a nih kha. Matheus Nunes, Rico Lewis, John Stones leh Manuel Akanji te chu Rodri hmunruak hnawhkhat thei tur nia ngaih an ni mek.