Football ngaina inti tan chuan Kaka hriat loh hi thil theih a ni lova, a vanglai na na na chuan ani aia footballer tha hi an awm bik lo tih ngam a ni.
Kaka-a hmingpum hi Ricardo Izecson dos Santos Leite- a ni a, mahse Kaka tih tawpin emaw Ricardo Kaka tih emaw a hriat lar a ni. Kum 1982 April thla ni 22 khan Gama, Brazil-ah a lo pianga, tunah hian kum 37 mi niin kum 2017 khan football khelh a chawlhsan thu a puang.
Kaka hi attacking midfielder niin, a passing leh ball thiam avangin a lar hle a, a thiante tan goal khung tur siamsak a thiam bakah a mah pawh hian goal a khung thei hle bawk. Player taima, hawi zau leh fing em em mai niin, a che ranga, a tlan chaka, ball a khelh theiin, midielder tha in an mamawh ang chu a mahah hian a kim vek a tih theih awm e.
Kaka hi Brazilian club Sao Paulo academy chhuak a ni a, kum 1994-ah Sao Paulo academy-ah hian lutin, kum 2001 khan first team tan a khel tana, kum 2003-a AC Milan in a lei thlengin Sao Paulo-ah hian a khel.
Italian club AC Milan chuan kum 2003 khan Kaka hi Europe-ah hruai lutin a manah euro maktaduai 8.5 an senga, AC Milan hian Kaka an lak luh hian football chanchina mi ropui ber tur zinga mi an la lut ang tih ngaihna an hriat kher a rinawm loh.
Milan-ah Kaka hian first eleven a chang chho zui nghal tih theih a ni a, a season hmasa berah Milan tan vawi 30 inlanin goal 19 a khunga, assist eng emaw zah a nei nghal bawka, he 2003-04 season hian Milan hian league title an la.
Kaka hian hma a sawn chho zela, Milan-a a season hnihnaah hian Milan chu UEFA Champions League final an luta, final-ah chak lo mahse Kaka hi he season-a Champions League-a assist ngah ber a ni a, UEFA Club Midfielder of the Year-a thlan a ni bawk.
2006-07 season khan Kaka hian AC Milan hi Champions League-ah a champion pui ta nge nge a, hemi season hian ani aia Champions League-a goal khung hnem an awm lo. A chet that em avangin hemi season hian Kaka chuan football-a mimal chawimawina hlu ber ber FIFA World Player of the Year, Ballon d’Or, UEFA Club Footballer of the Year leh IFFHS World’s Best Playmaker lawmman te a hui fai vek a ni.
Hlawhtling taka AC Milan tana a khelh hnuah Real Madrid chuan kum 2009 khan Kaka hi an leia, a manah euro maktaduai 67 zet an senga, khawvel a deng chhuak a nih kha.
Kaka hi a ram Brazil tan pawh trophy lian tham a chawi nual a, Brazil U20 tan a khelh hnuah kum 2002 khan Brazil senior team tana khel tura koh a ni. Brazil tan hian game 92 lai khel hmanin, goal 29 a khung hmana, kum 2002-a Brazil-in FIFA World Cup nimawi an chawi tum pawh khan Kaka hi squad-ah a tel ve a ni.
Ropui takin Real Madrid zawm mahse Kaka hi tum angin Madrid lamah a awm thei lova, a season hmasa berah Real tan hian goal kua khungin assist pariat nei mahse hliam nasa tak takin a tlakbuak tak reng avangin hniam lam a pan chho tial tial.
Hliamin a tlakbuak hnuah Kaka hian ngai a awh thei ta meuh lova, kum 2011-12 season khan rawn ziaawm leh mahse a hma a phak thei tawh lo a ni bera, kum 2013 nipui khan Real Madrid a chhuahsan duh thu sawichhuakin, kum 2013 nipui khan AC Milan-ah a kir. Kaka hian Real tan season li chhung a khela, vawi 120 khel hmanin, goal 29 a khunga, assist 32 a nei hman a ni.
AC Milan-a a kir hnu hian, a game hmasa ber ah Kaka hi a inhliam leh nghala, hetah hian a inkhelh leh theih hma chu AC Milan hnen atang hian hlawh a la duh lo nghe nghe. Kaka hian season khat chiah Milan tana a khelh leh hnuah kum 2014 khan US lamah a kala, Major League Soccer club Orlando City a zawm.
Orlando City a zawm tirh hian a club hmasa ber Sao Paulo lamah Kaka hi loan-in a khel zuaia, MSL club tan hian kum 2017 thleng khelin, season thum chhungin Orlando tan league game 75 khelin goal 24 a khunga, assist 22 a nei hman. Kaka hian kum 2017 December thla khan a club hlui Sao Paulo leh AC Milan-te sawmna hnawlin inkhelh a chawlhsan thu a puang.
Kaka hi Isua Krista ringtu tha tak a ni a, khawvel hmaah Isua ringtu a nih a zahpui ngai lo. Goal a khunga a celebrate-in emaw inkhel zawhah te emaw Kaka hian a jersey phelhin a, a jersey hnuaiah chuan kawr varah ‘I Belong To Jesus’ tih a ziak thina, ‘Isua ta ka ni’ tihna niin, hei hi a larpui hle bawk a ni.
