Transfer bazara titi luah rengtu Richarlison chuan Tottenham a pan dawn tih a chiang ta a, sum chungchangah Everton leh Spurs an inrem tawh.
Kum 25 mi hi £50m man vel ni tura ngaih a ni a, sum chungchangah hian inremna nei tawh mahse engemaw neuh neuh tihfel tur erawh ala awm. Mimal thilah pawh inremna an nei tawh a Spurs hian Ninganiah an lakluh fel a rinawm.
Brazilian forward hian 2018 khan Watford chhuahsanin Everton a pan a, Toffees hian amanah £50m an seng.
Merseyside club tan hian game 152 khelin goal 53 a khung hman a, season liamta khan Everton player zingah goal khung hnem ber a ni.
Season zota khan an game hnuhnung pakua atangin goal rukma khung a, tla thei dinhmun atanga Everton khaichhuakin 16-na an ni.
A club thar tur hian season lo awm leh turah Champions League an khel dawn a, Ivan Perisic, Fraser Forster leh Yves Bissouma-te pawh an lalut tawh.
Richarlison chungchanga inremna an neih thuai chhan hi Everton sum dinhmun chhiat vang ani a, ba leh hloh an ngah avangin hremna tawk thei dinhmunah an ding. Ui tak chungin Palmeiras forward hlui an chhuahtir a rinawm a, Spurs tan thil tih a awlsam phah thung.
Tunkar hian Premier League kum a tawp dawn a, hetah hian club hrang hrangte'n an sum dinhmun an thehlut ang. Frand Lampard enkawl mek team hian sum an lakluh dawn tak avangin hremna an pumpelh theih a beiseiawm a, hrem tawk se chuan season thar Premier League-ah point paihsak anni ang.
Season hmasa khan £30m vel sengin Demarai Gray, Vitaliy Mykolenko leh Nathan Patterson an lalut a, £50m an hmuh dawn tak avang hian an hman ral aiin an hlep a tam dawn tihna a ni. Hrem tawk lo hian awm thei pawh nise an buaizui zel a rinawm a, loan an lak bakah ba tam tak an nei mek.
Tottenham hian Anthony Gordon pawh Goodison Park atanga lakchhuah an duh a, Richarlison rual hian an dawr niin Sky Sports chuan an tarlang.
Everton chuan kum 21 mi hi chelh thei an duh hle a, amah hi chuan White Hart Lane-a insawn a duh niin an sawi.
England Under-21 winger hian London pan a duh niin The Sun chuan an ziak a. Premier League season zo taah khan game 35 a khel a, goal li khungin midang thun tur vawihnih a siamsak bawk a ni.