Arsenal manager Mikel Arteta chuan Tottenham nena an inkhelh tum khan, an midfielder Declan Rice a inhliam tih a sawi a, a inhliam na em tih erawh a la sawi chiang thei lo.

Sunday zan khan Premier League inkhelah North London derby kan hmu a, Emirates Stadium-ah Arsenal leh Tottenham te chu si hnih ve ve inpe in an inhnehtawk.

He inkhelah hian Declan Rice chuan inkhel bul tan mah se, half time zawhah a lut tawh lova, Arteta chuan Jorginho a dah lut a, Spanish manager Arteta chuan Rice hian a hnungzang a ti na niin a sawi.

Inkhelh zawhah Arteta chuan Rice a lak chhuah chungchang zawhna chhangin, “A hnungzang a ti na a, inkhelh lai khan a nuam lo hle a, kan la chhuak lo thei lo a ni. A nat dan kan en chian leh a ngai a, amah ang lak chhuah a ngai tawh a nih chuan a nuam lo ve hle tihna a ni,” tiin a sawi.

Nipui bazar lai khan Arsenal hian Rice hi West Ham atangin man to takin an lei a, a manah pound maktaduai 105 lai sengin, kum 24 mi hi Arsenal player pawimawh ber zinga mi a nghal a, mahse a chawlh ve rih a ngai maithei.

Arsenal hi hliamin a tibuai ve viau a, an defender thar Jurrien Timber chu season chanve chuang a chawlh a ngai dawn a, Thomas Partey, Leandro Trossard leh Gabriel Martinelli te pawh an inhliam mek a ni.