Arsenal midfielder Declan Rice chuan a hnungzang a ti na a, mahse vanneihthlak takin a inhliam na lo niin chanchinbu mite chuan an tarlang.

Sunday zan khan North London dervy-a Tottenham an mikhual tumin Rice hian first half bak a khel thei lova, inkhelh zawhah Arsenal manager Mikel Arteta chuan an midfielder hian a hnungzang a tihnat thu a sawi.

Spurs nena an inkhelh zawhah Arteta chuan Rice a lak chhuah chungchang zawhna chhangin, “A hnungzang a ti na a, inkhelh lai khan a nuam lo hle a, kan la chhuak lo thei lo a ni. A nat dan kan en chian leh a ngai a, amah ang lak chhuah a ngai tawh a nih chuan a nuam lo ve hle tihna a ni,” tiin a sawi.

Thawhtanni khan chiang zawkin Rice-a injury en a ni a, a hliam na lo niin a lang a, game khat bak a awl a ngai lo niin chanchinbu thenkhat chuan an ziak a ni.

Arsenal hian tun kar hian Carabao Cup third round inkhelah Brentford an tlawh dawn a, he inkhelah hian Rice a inlan a rinawm lova, mahse kar leh lama Champions League an khelh hunah Rice hi a inkhelh theih a rinawm.

Arsenal tan Rice inhliam na lo hi chanchin lawmawm a ni a, thla leh ni 8-ah Premier League champion lai Manchester City an mikhual dawn a, hetah hian Rice bakah Arsenal player inhliam dang Gabriel Martinelli, Leandro Trossard leh Thomas Partey te chu an fit hman vek a beisei a ni.