Declan Rice chu damlohna avangin Al Wakrah stadium-a England training-ah a tel ve thei lo nia report a ni a, a inhliam dan tak erawh puanzar a ni lo, quarter final match-ah a inlan thei dawn nge dawn lo a la hriat loh.

England-in Qatar World Cup a khelh tawh zawng zawngah Rice hian starting XI a chang vek. Mahse Quarter final-a Three Lions leh France inbeihna turah hian Rice dinhmun tur hi a chiang lo. West Ham midfielder hi engtia rei nge a chawlh dawn hriat theih a la ni rih lo.

England striker Callum Wilson pawh a tihrawl enkawl chhoh mek a nih avangin nilaini training-ah khan a inlan lo ve bawk. Group stage-ah khan Wilson hi second-half substitute-a hman a ni thin a nih kha.

Raheem Sterling pawh a chanchin kan hre vek, England-ah a thlawk haw zawk a nih kha, Ben White pawhin mimal harsatna a neih vangin England squad atangin a inhnukdawk bawk.

England-in 3-0 a Senegal an hneh tum khan Rice hi Jordan Henderson leh Jude Bellingham te kianga tlanin, England midfield innghahna a ni.

Inrinniah Rice hian France a hmachhawn ve thei dawn lo a nih chuan Kalvin Phillips-a tan Qatar World Cup-a starting XI hmun a inhawng dawn tihna a ni a. He Manchester City midfielder hi Wales leh Senegal an hmachhawn tum khan second half dah luh a ni.

England hian squad an nei zia hle, an game-ah pawh nasa takin hma an sawn tih a lang chiang a. Hetih lai hian Declan Rice a inlan thei lo a nih chuan harsatna lian tak chu an tawk ve thei dawn chiang a ni.