Nemanja Matic chuan Rennes-ah hlimna a hmu tawh lova, an hotute hnenah chhuah a dil niin an sawi.

Manchester United leh Chelsea midfielder hlui hian Premier League-a kir a duh ber niin L'Equipe chuan an ziak a, a chhuahna an dal anih chuan inkhelh chawlhsan mai a pawi tilo.

Ligue 1 club hian nikum nipui lai khan AS Roma atangin an thlemlut a, midfield-a an rinrawl ber pakhat ni mahse a lungawi tawh lo. Rennes tana game 19 a khelh tawhah goal ala khung miah lova, Europa League group stage-ah assist vawi thum a nei tih loh chu fakna tur a awm rih lo.

Yellow card vawi sarih a hmuh avangin Ligue 1-ah game hnih a khel thei lo tawh a, France-ah thla ruk chiah la awm mahse insawn a duh leh der tawh. A teammate-te nen an inngeih lo tih thawm a awm a, a fate sikul kalna chungchangah pawh buaina a nei niin a lang.

Thawhlehni khan Rennes training-na hmunah hmuh tur a awm lova, a locker pawh a ti ruak tawh niin an sawi. French club tan hian khelh leh a tum tawh lo niin Guardian chuan an tarlang a, England-a kir theih dan a ngaihtuah niin an sawi a ni.