Arsenal chuan Emirates Stadium-ah Brighton an mikhual a, team hnih te 1-1 in an inhnehtawk.
Arsenal tan Havertz chuan first half-ah goal a khung a, Declan Rice chuan yellow card vawi hnih chawiin hnawhchhuah a ni a, Pedro chuan second half-ah Brighton siphurh a rul.
Inkhel hmuhnawm tak a ni a, goal mouth action kan hmu nual. First half minute 38-ah goal a lut a, Saka ball pek tha tak chu Kai Havertz chuan umin, box pawn atangin goalkeeper a pet khum a, si khat faiin Arsenal chuan hma an hruai.
First half tawp dawn tepah Declan Rice chuan yellow card a chawi a, second half tirah yellow card vawi hnihna chawi lehin, hnawhchhuah a ni.
Mual veilam sirah Rice chuan Joel Veltman a titlu a, referee Chris Kavanagh chuan foul hamin, Brighton lam chuan quick free kick pet an tum, Veltman ball pet tur chu Rice chuan a lo chhuih sawn sak zeuh, ani hian Rice a pet chhunzawm bawk. Referee chuan foul a ham a, Rice hi yellow card dang pe lehin a hnawtchhuak ta a ni.
Second half tir lama atangin Arsenal hian kim loin an khel a, second half chu Brighton chan a ni deuh tawh mai. Minute 58-ah Yankuba Minteh-a pet chu David Raya chuan a lo dang a, hemi per hi João Pedro chuan goal-ah a chhuih lut chhunzawm a, 1-1 in team hnihte an inhnehtawk ta a ni.
Kim loin khel mah se Arsenal an tang thei hle a, counter attack hmangin chance hlauhawm deuh deuh an nei a, Kai Havertz chuan goalkeeper chiah a hmachhawn tihin a pet goal lo a, mual dinglam sir atanga Havertz cross chu Saka chuan an pet goal thei lo bawk.
Inkhelh zawhah Arsenal boss Mikel Arteta chuan, "Referee khan a ham lai lo hle, kha kha mak ka ti em em. First half-ah card phawrh theihna chance vawi hnih a awm a, engmah a thleng lo.
"Rice khan a hnunga player awm kha a hmu lo a ni. Referee khan a hmu chiang lo a nih pawhin en chian theih a la ni zel bawk. Kha kha red card a nih chuan, 10vs10 -a inkhel tur kan niin ka la ngai tho, anni lam pawh kha hnawhchhuah phu an awm a ni.
"Kan game chungchangah chuan, bul kan tan tha a, chance hlauhawm tak tak vawi thum emaw vawi li emaw vel kan siam. Mahse goal-ah erawh kan chantir lo.
"Goal kan khung a, kan dinhmun a tha chho. Second half-ah pawh tha takin bul kan tan a, mahse referee thutlukna khan game a tidanglam zo vek a ni," tiin a sawi.