Erling Haaland chuan goal khung a chawlhsan thei lo, Etihad Stadium-a Napoli an hmachhawn ṭumin goal a khung leh a, si hnih faiin hnehna an chang a, Doku nen Manchester City an chakpui.

Kevin de Bruyne chu Etihad Stadium-ah a kir leh a, ropui takin Man City supporter ten an lo lawm a, banner mawi tak tak an lo phochhuak. Red card an chawi hma avangin De Bruyne hian Manchester City a hmachhawn rei lo.

Inkhelh ṭan aṭanga minute 21-na lekah Di Lorenzo chu hnawhchhuah a ni a, box pawn chiahah Erling Haaland a petthlu a, referee Felix Zwayer chuan VAR hmanga a ennawn hnuin red card a phawrh.

Kim loin Napoli an khel hma hle a, coach Antonio Conte chuan De Bruyne la chhuakin Mathias Olivera a dah lut chhunzawm a, heta ṭang hi chuan Manchester City an chungnung chho ta ngar ngar.

Napoli goalkeeper Vanja Milinkovic-Savic kan hmu ngun malh malh hle, a tam zawk nih City-in an hmang ṭangkai a, na takin an nawr a, Napoli goal-ah an shot pawp pawp, first half chhungin Vanja Milinkovic-Savic chuan an goal a venghim a, save ṭha tak tak a nei.

Second half-ah erawh a tam zawk City chuan goal an khung ta nge nge. Minute 56-ah Rodri ball pek chu Phil Foden chuan mawi lutukin a virpui a, a kangin vawi khatah a pet nghal. Hei hi Haaland chuan um lutin a tauh goal chhunzawm. Man City-in goal an thawhchhuah dan hi a mawi tak zet a ni.

Minute 10 hnuah Doku a che ropui, box pawn aṭangin mawi lutukin box veilam sirah ball a luhpui, defender pathum karah a put chhuak phei a, goalkeeper kap karah mawi lutukin a pet goal chhunzawm a, si hnih faiin Manchester City chuan hnehna an chang ta a ni.

Erling Haaland bawk sawi a ngai leh ta, kum 25 mi Manchester City striker hian goal khung a chawlhsan hleithei lo. Norway tan goal 5 a khung hnuah Manchester United lakah goal 2 a khung a, Champions League match-ah Napoli lamah goal a khung leh bawk.

Champions League-ah goal 50 a khung tling ta der mai le. Game 49 lekah goal 50 a khung tling ta chu a ni a, UCL goal 50 khung tlin nana game mamawh tlem ber record thar a ni ta. UCL-ah Haaland hian City tan goal 27 a khung a, Borussia Dortmund-ah khan goal 15 a khung a, RB Salzburg-ah khan goal 8 a khung bawk a, game 49-ah goal 50 a khung tling ta a ni.

Ruud van Nistelrooy kha goal 50 khung tlin nana game mamawh tlem ber a ni ṭhin, ani khan game 62-ah goal 50 a khung. Goal 50 khung tlin nana game an khelh zat hetiang hian:

• Haaland : 49
  Nistelrooy : 62
  Lionel Messi : 66
  Lewandowski : 77
  Mbappe : 79
  Benzema : 88
  Cristiano : 91
  Raul : 97
  Henry : 103
  Muller : 130

Premier League lamah pawh Haaland hian goal 90 khung tlin nan game 101 chiah a mamawh a, record thar a siam chho mawlh mawlh dawn a nih hmel. Haaland hian Champions League-ah goal 50 a khung tling ta a, Champions League-a goal khung hnem ber Cristiano Ronaldo record hi a khum thei ang em?

Portuguese forward, Mr Champions League an tih mai Ronaldo chuan UCL goal 141 a khung a, he record hi khum a harsa dawn hle niin kan ngai. Hetih lai hian kum 25 mi Erling Haaland hian game 49 aṭangin goal 50 a khung tling ta der chu a ni si a. Tin, Champions League kalphung tharah hian game an khel hnem a, goal pawh a lut hnem bawk a, Haaland hian Ronaldo record hi a khum theih mai a rinawm ta hle a ni.