Tun weekend liamta khan La Liga table a danglam dawrh mai, hmahruaitu Real Madrid chu Atletico Madrid lakah an tlawm a, Barcelona erawhin ropui takin Celta Vigo an lehthal.

Game 6 atangin Barcelona leh Girona te chuan point 16 ve ve an nei a, goal difference-ah Barcelona an chungnun zawk avangin hmahruaitu an ni. Real Madrid erawh a zawnin vawi 5 chak mah se, Madrid Derby-ah 3-1 in an tlawm a, point khatin Barcelona an phak lo mek.

Pathianni zan zanlai khan Estádio Cívitas Metropolitano-ah Real Madrid an leng lut, mual neitu Atletico lamin Morata goal hnih leh Griezmann-a goal khat hmangin 3-1 in hnehna an chang.

Atletico Madrid goal thum te hi lu hmanga khung vek a ni a, mual veilam sir atanga cross an lo tauh luh vek a ni bawk. Tan atanga minute 4-ah mual veilam sir atanga Dias Lino cross tha tak chu Morata chuan a tauh goal. 

Minute 18-ah mual veilam sir atanga Saul-a cross tha tak chu Griezmann chuan a tauh goal ve leh. Real Madrid lamin Kross hmangin minute 35-ah an chhang let a, box pawn atangin bottom corner-ah mawi lutukin Kross hian a chhuih goal, goal mawi tak a ni e.

Second half tan a ni a, Atletico chuan Morata hmang bawkin goal dang an khung leh. Minute 46-ah mual veilam sir atanga Saul-a cross tha tak chu Morata chuan a tauh goal leh a, 3-1 in Atletico an chak ta a ni.

Real Madrid hian an siphurh rulh tum viau mah se, Centre forward an neih loh an tuar hle. Atletico lam defending a tha si a, box pawn atangin an shot deuh pawp pawp a, a bak tih theih dang an nei lo.

Barcelona erawhin si hnih an phurh zet hnuah Celta Vigo chu 3-2 in an lehthal mawi hle. Estadi Olímpic Lluís Companys-a inkhel hmuhnawm takah Larsen chuan minute 19 lekah box veilam sir atangin bottom corner-ah mawi lutukin a chhuih lut. Si khat faiin Celta lamin hma an hruai ngar ngar.

Second half minute 76-ah Iago Aspas-a through ball tha lutuk chu Douvikas chuan umin, box veilam atangin bottom corner-ah a chhuih lut leh. Barcelona home-ah mikhual lamin si hnih faiin hma an hruai. 

Mahse Barcelona an rawn comeback mawi hle, minute 81-ah Felix-a chip tha lutuk chu Lewandowski chuan box chhungah um lutin, goalkeeper mawi takin a pet khum a. 

Minute 85-ah Lewandowski chuan Barcelona siphurh a rul ta, mual dinglam sir atanga Cancelo cross chu Polish striker hian chiang zetin a chhuih goal, 2-2  a ni ta. Barcelona hian point 3 hlawhchhuah an tum ruh hle.

Minute 89-ah mual veilam sir atanga Gavi ball vawrh chu tlan luh pahin Cancelo chuan hnai tak atangin a chhuih goal a, 3-2 in Barcelona chuan hnehna an chang ta a ni.

Tun nipui bazara Barca-in an player lak thar te an chhawr tangkai nghal hle. Tun season La Liga-ah game 6 khel tawhin, vawi khat an khingpui an inhnehtawkpui a, a bak zawng an la chak vek. Champions League lamah pawh bul an tan tha hle bawk a ni.

Girona hi an khel tha tluang ngar ngar khawp mai, anni pawh vawi 5 an chak a, vawi khat an khingpui an inhnehtawkpui. Hetih lai hian, Mallorca, Granada, Las Palmas, Sevilla, Getafe leh Real Sociedad te an hmachhawn a. 

Team tha tak an ni nge an fixtures a la hahdam deuh tih erawh sawi a har khawp. Kar laihawlah Villarreal an tlawh ang a, kar tawpah Real Madrid an mikhual ang. Real Madrid an hmachhawn hunah team khawng an ni nge ni lo kan hre thei turah ngai ang.