UEFA Super Cup-ah Real Madrid chuan si hnih faiin Europa League Champions Atalanta an hneh a, PSG atanga Real Madrid pantu Kylian Mbappe chu a vawi khat nan inlanin, goal a khung nghal a ni.

First half-ah goal a lut lo a, second half tir lamah Atalanta chuan goal an khung teuh hle, Courtois chuan tha lutukin a lo dang.

Minute 59 a ni a, mual veilamah Vinicius Jr. chuan ball tha lutukin a la lut a, a cross chu changtu nei lo Valverde chuan awlsam lutukin a lo chhuih goal.

Minute 68-ah Mbappe chuan goal a khung chhunzawm bawk. Box veilam sir atanga Bellingham cross tha lutuk chu box chhung atangin Mbappe chuan a chhuih goal a, si hnih faiin Real Madrid chuan hnehna an chang ta a ni.

Real Madrid hmatawng te an hmuhnawm kher mai, Mabappe, Vini Jr leh Rodrygo te a hmaah an awm a, Bellingham, Tchouameni leh Valverde te a laiah awmin, Mendy, Rudiger, Militao leh Carvajal te a hnungah an awm.

Second half tir lam atangin Mbappe chu a awm thiamna veilamah a tawlh chho a, Real Madrid hmatawng te hi an duh dan danin an insiksawi thei tih a lang chiang a, tun season chu team hlauhawm tak an ni leh ngei dawn e.

An khingpui Atalanta hian chance hlauhawm vawi hnih khat bak an nei lo, first half-ah Militao chuan an lamah a tauh goal teuh hle a, anmahni cross bar a tauh per. Second half tir lamah Courtois chuan tha takin a save bawk, hei bak chu Atalanta hian chance hlauhawm an nei lem lo.

Warsaw-a Super Cup hmuhnawm takah hian Real Madrid chuan an that zia an lantir nghal a, Mbappe pawh a langsar nghal hle bawk. Bellingham bawk chu Real Madrid player tangkai a ni leh a, harsatna nei loin Real Madrid hian hnehna an chang a ni.

August ni 19 hian Real Madrid chuan 2024-25 La Liga season an khuhhawng ve dawn a, Mallorca an hmachhawn ang.