Trent Alexander-Arnold chuan naupan lai chauha trophy chawi nih a duh loh thu a sawi chhuak.

Liverpool right-back hian Liverpool-ah a contract tawpna season a hmang mek. Contract thar a ziak lo a nih chuan, January thla atangin ram dang club nen pre-contract an ziak thei tawh dawn. 

Alexander-Arnold hi Real Madrid-in an duh niin thu a thang mek reng a, ani pawh hian Real Madrid pan a chak hle nia ngaih theih turin thu a sawi tlat mai.

TAA hian kum 21 vel lekah Liverpool tan Champions League, Club World Cup leh Premier league no mawi a lo chawi tawh a ni.

Greece an hmachhawn hmain ITV Sport-in a kawmnaah Alexander-Arnold chuan, "Naupan lai chauha trophy chawi nih ka duh lo.

"Tunah hian ka career-a ka that ber lai ka tawng mek a, naupan lai chauha trophy chawi nih ka tum lo a ni.

"Ka career-ah trophy chawi miah loin ka awm thei kha a ni a. Tin, trophy tam tak chawi theihna chance pawh ka nei bawk.

"Football kan chawlhsan hnuah, darthlalangah kan han in en ang a, ka thil hlawhchhuah te chu duhkhawp lohna leh inchhirna lian tak ka nei ang tih ka hlau a ni.

"Chutih laiin trophy, medal, goal leh assist te hi min tihlutu a ni chiah em? Tih te pawh ngaihtuah tham a ni bawk. 

"Ka naupan laiin ka theihna sang tak tipung turin min hrilh thin a, ka theihna ka phochhuah hian a hlu ber niin ka hre bawk a ni," tiin a sawi.

Arne Slot-a hnuaiah Liverpool-in season bul an tan tha hle. Premier League hmahruaitu an ni mek a, Champions League lamah pawh an game hmasa pahnihah hnehna an chang ve ve bawk.

Alexander-Arnold hian Liverpool-ah trophy tam tak hlawhchhuah a inbeisei tawh lo a ni thei ang em? Real Madrid-ah trophy tam tak hlawhchhuah a inbeisei tihna nge? A tawngkam hian ngaihtuah a tithui a, tun season chhunga contract thar a ziak lo a nih chuan, nakkum nipui bazarah free transfer-in a chhuak thei dawn a ni.