Eden Hazard chuan a awm zel dan tur a tichiang lo leh tawh a, tun hnaiah a duhthusam reng thin, Real Madrid lam pan chu a la chak reng thu a sawi chhuak leh tawh a ni.

Hazard hian tun season bul a tan tha hle mai a, Maurizio Sarri hnuaiah Chelsea chuan hneh loh an la nei lo a, inelna hrang hranga an khelh tawhah Hazard hian goal 8 ngawt mai a thun tawh a. Premier League bikah Blues chu Manchester City leh Liverpool te nen point inang hmuin hmahruaitu an ni hlawm a ni.

Belgian star Hazard chu Russia rama FIFA World Cup-ah khan thiam ber dawttu atan an thlang a, Belgium chu pathumna a nihpui thei a. A hma deuh atang tawhin Real Madrid zawm theih a chak thu hi a lo sawi ri zeuh zeuh tawh a, tunah pawh a tharthawh leh ta a, heti a nih chuan Stamford Bridge a chhuahsan lo ang tih sawi theih a ni ta lo a ni.

“World Cup zawh hnu khan Russia ramah ka khelh that em avangin chona thar hmachhawn a hun tih ka lo sawi tawh a. Tunah pawh ka che fuh chho ve zel a, a hmaa ka thil sawi chungchangah khan ka ngaihdan ka la thlak miah lo a ni,” tiin Hazard chuan a sawi.

A sawi zelnaah, “Real Madrid hi khawvela club tha ber a ni a. Vawiinah hian dawt sawi ka duh lo a, naupang ka nih lai atang tawhin he club hi ka ngaisang tawh a, an tana khelh theih hi ka chak ber a ni thin a, tun thleng hian ka duhthusam hi a la reh lo a ni,” a ti.

“Hemi chungchang sawi fo pawh hi ka duh lo a, eng nge lo thleng dawn kan la hre chawp zel mai ang a. Tunah hi chuan hun pawh ka nei meuh lo a, ka hma lam hun zel tur chu nakinah kan la sawi chauh ang,” a ti bawk.

Real Madrid chuan Cristiano Ronaldo an hralh tawh a, a aiawh tur Galactico hi an la leh rih lo a, a hmun ruak luah tur hian Eden Hazard hi a iaiawm lo hle dawn a. Tun hnaiah Real hi an che chhe hle a, 1985 hnua a vawi khatna atan game 4 chhung chu a zawnin goal an thun thei tawh lo a, an boruak thlak danglam thei tur an mamawh zual hle niin a lang.

Eden Hazard hian 2020 thleng Chelsea-ah contract a la nei a, Thibaut Courtois anga chet erawh a duh loh thu a sawi a. Courtois khan kum khat chiah contract a la nei a, a hlutna a tlahniam mek a, chutih lai tak chuan August thla khan Real Madrid a zawm a ni.

Hazard chuan, “Khatiang kha ka duh ve lo a, ka tana tha tur ka duh a, club tana tha tur ka duh bawk a. Club hian engkim min tihsak a, hei vang hian club tana tha thei ang ber chu ka ngaihtuah let ve turah ka ngai a ni,” a ti.