Real Madrid chuan Ajax midfielder Donny Van de Beek chu an dawr niin chanchinbu mite chuan an tarlang a, chanchinbu thenkhat chuan Ajax hian Real Madrid dawrna hi an pawm tawh niin an tarlang bawk.

Real Madrid chuan kum 22 mi Van de Beek pound maktaduai 55-in an dawr niin tarlan a ni a, an lalut thei a nih chuan Real hian Dutch midfielder hi kum nga emaw kum ruk daih contract an ziahpui dawn niin tarlan a ni bawk.

Real Madrid hi tun nipui bazar inhawn tirh atang khan midfielder nen sawi zawm an ni deuh renga, midfielder an zawng niin a lang. Tottenham midfielder Christian Eriksen leh Manchester united midfielder Paul Pogba-te nen sawizawm ni viau mahse Eriksen leh Pogba hi an lakluh theih hmel rih lo.

Real hian season liamtaa Ajax tana khel tha em em Van de Beek-a lam an hawi tan niin a langa, chanchinbu thenkhat tarlan dan atang chuan rin aia thui inbiakna an kalpui tawh a ang hle.

Van de Beek hi season liamta khan Ajax-ah Frankie de Jong leh Matthijs de Ligt-te chuan an hliahkhuh hneh em avangin a lansarh tur angin a langsar lo a tih theiha, a khel en chik tan chuan team tana a tangkai zia; a ball pek fin zia leh a ‘creative’ zia kan hre theuh awm e. Season liamta khan Ajax tan Van de Beek hian game 57 khelin goal 17 khuung assist 13 lai a nei.

Real hian pound maktaduai 55 velin Van de Beek hi an lalut thei a nih ngat chuan, pound maktaduai 100 chuanga Eriksen emaw Pogba lakluh aiin an ti fuh maithei ti ila kan sawi sual tam a rinawm loh hle a ni