Real Madrid chuan Turkish club Fenerbahce atangin rawlthar Arda Guler an lakluh thu an puang a, Guler hian Real Madrid-ah kum ruk daih contract a ziak.

Real Madrid hian Ningani khan Guler an lakluh thu hi an puang a, Zirtawpni hian a lawmluhna hun an hman tur thu Los Blancos hian an tarlang a ni.

Turkish playmaker manah hian Real hian euro maktaduai 20 an seng a, a khelh that dan a zirin euro maktaduai 10 dang an chawi belh thei a, an hralh a nih chuan, an hralhna atanga 20% chu Fenerbahce-in an chang bawk ang.

Guler hi kum 18 chauh la ni mah se, season liamta khan Fenerbahce player pawimawh tak a ni a, Fenerbahce tan hian goal li a khung bakah assist vawi li a nei bawk a, Turkish Cup final-ah Man of the Match atana thlan a ni nghe nghe.

Guler hian kum 16 mi a nihin Fenerbahce tana a game hmasa ber a khel a, Turkish Super Lig-a a game hmasa berah assist a nei nghal a, season liamta khan Fenerbahce hian jersey number 10 an pe.

Rawlthar beiseiawm tak a nih avangin Guler hi Arsenal, Manchester United, Newcastle United, Bayern Munich leh Paris Saint-Germain te pawhin an ngaihven hle niin chanchinbu mite chuan an tarlang a, mahse Real Madrid in an chang ta a ni.