Karim Benzema a input chhuah dawn avangin Real Madrid chuan striker lakluh tur an zawng a, Tottenham striker Harry Kane chu an hmu tai hle niin The Athletic chuan a tarlang.

Real Madrid manager Carlo Ancelotti chuan, an club hotu te hnenah Kane a duh thu hi a thlen tawh niin The Athletic hian a tarlanga, nipui bazar inhawn hunah Madrid club hian England captain hi an dawr ngei dawn niin a lang.

Real hian June thla ral rualin an captain Benzema bakah Eden Hazard, Marco Asensio leh Mariano Diaz te an chhuah zalen vek dawn a, heng bakah hian nipui bazar inhawn hunah player hralh an neih a rinawm bawk a, in siksawi viau an tum niin a lang.

Real hian striker an nei dawn lova, striker hrawl tak an lak ngei a ngai dawn a, Tottenham chhuahsan tura ngaih Kane hi man to taka an dawr a rinawm viau nia tarlan a ni.

Kane hian Tottenham-ah season khat daih contract bak a nei tawh lova, Tottenham hian la ui mah se kum 29 mi chhuah a duh. Tottenham hian Kane hi contract thar an ziahpui theih a rinawm tawh lova, nakkuma a thlawn chan aiin kuminah man to taka an hralh mai a rinawm hle.

Kane hi Manchester United pawhin an dawr dawn niin chanchinbu mite chuan an ziak a, mahse Tottenham chairman Daniel Levy chuan Premier League club dang hnena an player tha ber hralh aiin, Real Madrid hnena hralh hi a thlan a rinawm ber a, Real hian Kane lakluhna chance an nei tha hle dawn a ni.