Nilaini zan zanlai dar 12:30-ah Barcelona chuan Real Madrid an mikhual dawn, Copa del Rey Semi final 1st leg-ah khan si khat faiin Barca an chak tawh a, Camp Nou-ah return leg khelh a ni leh dawn a, hetah hian De Jong a inlan thei dawn lo.

Kum 25 mi Dutch midfielder hi inrinni zana Elche an hneh tum pawh khan a inlan tawh lo, 4-0 laiin hnehna an chang ta tho a, tunah chuan Real Madrid an hmachhawn dawn, tlem chuan a awm loh a lang ve deuh tawh dawn niin a lang.

Barcelona boss Xavi chuan, "Ka midfielder palite an khel rual thei emaw thei lo emaw, kan game khelh tum dan chu a danglam dawn chuang lo.

"De Jong a tel theih dawn loh avangin tlem chuan harsatna kan neih ve chu a rinawm, mahse a tel loh avangin kan khelh tum dan a danglam dawn chuang lo a ni," tiin a sawi.

Xavi-a hnuaiah De Jong a khel tha thin khawp mai, hetih lai hian inhliam avangin harsatna a tawk ve leh khauh thin a.

Elche an hmachhawn tum khan Eric Garcia chu midfield-ah dah a ni a, a khel tha phian nghe nghe. Nilaini zanah hian Pedri pawh a inlan thei dawn lo bawk a ni.

"Eric hi a fing em em, khawi position-ah pawh a insiamrem zung zung thei.

"Full back-ah pawh, centre back-ah pawh, khawi hmunah pawh a chhawr theih a, ka midfielder te nen pawh hian tha takin an khel ho thei bawk a ni," tiin Xavi chuan a sawi bawk a ni.

Nikum nipui bazar laia AC Milan atanga Barcelona pan Franck Kessie pawh a insiamrem chho ve zel. Barcelona boss Xavi chuan, "Franck Kessie hi player khawng tak a ni.

"A chak a, a finishing a tha bawk. Danglamna siam turin a inpeih reng a ni. Tlaikhaw hnuah a rawn che tha a, hei hi kan tan a tangkai em em a ni," tiin Ivory Coast midfielder a fak.