RB Leipzig chuan Harvey Elliott lak chhuah dan a awm leh awm loh chungchang ngaihvenin Liverpool an dawr.

Inbiakna an nei tan chauh niin The Athletic chuan a tarlang a, indawrna a kaltluang dawn nge dawn lo tih erawh a la sawi lawk theih loh.

Thla hmasa khan Liverpool hian Elliott hralh an tum a nih chuan £40million bakah lei let leh theihna an chhiar a, buy-back option tel loa lei duh an awm a nih chuan £50m an chhiar bawk.

Xavi Simons chu Chelsea lamin an ngaihven mek a, ani hian German club hi a chhuahsan ngei a rinawm chho riau. Hei vang hian RB Leipzig chuan a thlakna tur an ngaihven ve nghal a ni.

Season liamta khan Elliott hi Premier League-ah vawi 2 chiah inkhelh bul a tan a, chu pawh an champion tawh hnu game-ah a ni. 2024-25 season chhung khan comeptition hrang hranga Elliott hi vawi 28 a inlan a, goal 5 a khung bakah assist vawi 3 a nei.

June thla khan Elliott chuan, "Kum khat khawhral ringawt pawh hi a uiawm tawh. Liverpool chhuahsan erawh ka duh lo. He club hi ka hmangaih a, fans leh team ka hmangaih a, min support tha em em bawk.

"Chutih laiin ka football career hi ka ngaihtuah ve erawh a ngai thung a ni," tiin a lo sawi a nih kha.

Under 21 European Championship-ah khan Elliott hi Player of the Tournament a ni a, England chuan a vawi hnih nan no mawi an chawi.

He midfielder hian goal 5 a khung a, final-ah goal 1 khungin, semi final-ah goal 2 a khung bawk a, English player zinga hmabak eng ber zinga mi a ni.

Kum 2019 khan Fulham atangin Elliott hian Liverpool a zawm a, Reds tan game 147 a khel tawh a, 2020-21 season khan loan-in Blackburn Rovers-ah a khel a ni.