Manchester United manager ten an ngaina lo, thehchhuah dan an ngaihtuah. Aston Villa lamah te loan-in an kaltir a, chumi hnuah Barcelona a pan ta.
Marcus Rashford pawhin Manchester United-a hun a hman dan kha hrehawm a ti ve hle. Hlim taka football khelh a duh a, tunah chuan nuam a tihna hmunah hun a hmang a, Champions League match-ah goal mawi tak tak vawi hnih khungin, Barcelona a chakpui.
Ningani zan khan Barcelona chuan St. James' Park an tlawh a, 2-1 in mikhual Barca chuan hnehna an chang a, Rashford chuan goal mawi tak vawi hnih a khung a, Newcastle United tan Gordon chuan goal khat a khung ve bawk.
Rashford hi a naupan lai aṭang tawhin player thiam leh hmabak eng tak nei niin an sawi ṭhin. A chetṭhat chang hi chuan world class player ang hiala chhal a ni ṭhin. Chutih laiin hun harsa tak tak te a tawng ve a, a thiamna leh theihna hman chhuah theih loh chang a ngah. Hansi Flick hnuaiah ropui takin a inlan ta.
St. James' Park-ah goal mawi tak vawi hnih a khung. Second half minute 58-ah mual dinglam aṭanga Jules Kounde cross ṭha tak chu box chhunga lo awm Rashford chuan kawh takin a tauh goal. A la duhtawk mai lo, minute 67-ah goal mawi lutuk a khung chhunzawm.
Rashford chuan ball tlanpuiin, box pawn aṭangin kawh lutukin a pet, Newcastle United goal top corner-ah a thlawk lut, goal kham a per hnuah net a puar pawp. Newcastle United goalkeeper Pope chuan a khawih phak lo chiang kher mai, goal mawi leh ropui tak a ni chiang e.
Hun tawp dawn tak takah Anthony Gordon chuan Newcastle tan goal khat a khung ve a, mual dinglam sir aṭanga Jacob Murphy cross chu Gordon chuan far post aṭangin a chhuih goal a, 2-1 in mikhual Barcelona chuan hnehna an chang ta a ni.
He match-ah hian goal hlauhawm a awm nual a, first half-ah Elanga cross ṭha lutuk chu Barnes chuan a pet goal teuh hle, Barcelona goalkeeper Garcia chuan ṭha lutukin a lo dang. Hun tawp lamah Dani Olmo pawhin goal a khung teuh hle bawk a, a shot ṭha tak chu Pope chuan a lo dang sak bawk a ni.
Inkhelh zawhah Barcelona head coach Hansi Flick chuan, "Training-naah Rashford-a theihna kan hmu hnem, tunah a thiamna leh theihna kan hmu chhunzawm, a lakah ka lawm em em a ni.
"Hmatawng lamah player kan nei ṭha a, chung zingah chuan Rashford pawh hi a tel. Ani kan kawl thei hi ka lawm a ni, duhthlan tur hmatawng lamah kan ngah a, ani ang thiamna sang nei kan kawl hi kan lawm hle.
"Heng goal pahnih hian Marcus chu nasa takin hma a sawntir ngei dawn. Inrintawkna a neih belh ang a, amah pawh a hlim ang. A goal hnih te kha a ropui dun khawp mai, phurna nasa tak a pe ngei dawn a ni," tiin a sawi.
Barcelona hian hmatawng an nei zia hlawm hle a, Lamine Yamal chu hliam avangin St. James' Park-ah hian a inlan ve thei lo. Yamal leh Rashford te hi hmun inchuh tur an ni dawn niin a lang a, Yamal-a inlan theih loh laiin Rashford a lo vul a ni.
Rashford chuan, "Barcelona tana khelh chu a ropui dangdai hle, tawnhriat danglam tak a ni. Barcelona hi a hma pawhin ka ngainat an ni ṭhin a, chak duhna thinlung kan pu a ni.
"Ka hlimin ka phur a, nuam ka ti hle. Kan team-a talent ṭha tak tak ka hmuh hian ka phur em em. Player thiam bik te kianga khelh chu ka tan chuan boruak thar leh nuam tak a ni," tiin a sawi bawk.
England-ah a inkhel a, goal hnih a khung. Goal satliah a ni lo, goal ropui tak a ni. Tin, inkhelh chhung zawngin a khel ṭha em em bawk. Rashford-a tan chuan hun duhawm tak a ni chiang. Tin, England manager Thomas Tuchel pawh St. James' Park-ah a lo ṭhu ve run bawk a, Rashford-a tan chuan hun nuam danglam tak a ni dawn chiang a ni.
Ruben Amorim chuan Rashford-a che vel chu hmuhnawm a tih a rinawm loh. Manchester United-ah khan eng boruak nge thleng? Hetianga player talent nei ṭha tak ni si, United tan khan enga ti nge ropui taka a khelh chhuah theih loh?
United hian player an chhuahtir nual, an chhuahna club lamah an khel ṭha chho hlawm em em bawk si. Coach nge United chhungkaw boruak hi dik lo zawk? Player te rilru puthmang hi a dik lo zawk em ni? United-ah chuan an tlan hne hne a, an theihna leh thiamna a lang chhuak lo, club dang an han pan a, an ṭhat zia kan hmu chhunzawm zel bawk si. Comment-na lamah in ngaihdan sawi zui ru le.