Real Madrid leh Manchester United defender hlui Raphael Varane chuan kum 31 mi niin football a chawlhsan.

Manchester United-in contract thar an pek loh avangin tun nipui bazarah khan Varane hian Serie A club Como a zawm. Italian club tan a debut game a khelh hnu lawkah a khup a tihliam leh hlauh mai.

A club thar tan hian Coppa Italia-ah a inlan a, minute 20 chiah a khel hman, a khup a tihliam, lakchhuah a ni a, football a chawlhsan chhunzawm ta a ni.

2018 World Cup-a France champion puitu Varane hi Real Madrid defender tha ber zinga mi a ni a, Los Blancos-ah season 10 a khel a, game 360 a khel hman.

Manchester United a pan a, English club tan season 3 hun a hmang a, game 95 a khel. Tun nipui bazarah khan free agent-in Como a zawm a, kum 2 chhung atan contract ziak mah se, a hriselnain a tlin ta lo a ni.

"Thil ropui tak tak ka tawng a, mahse heng hian tawp chin erawh a nei a ni. Football ka chawlhsan ta mai hi ka inchhir lo e. Ka hlawhchhuah zawng zawng te kha ropui ka ti a, ka tum ka hlen ta niin ka inngai," tiin Varane chuan a sawi.

An khaw club Lens-ah bul a tan a, kum 2011 khan Real Madrid a pan. Spain-a a awm chhungin trophy 18 lai a hlawhchhuak a, chung zingah chuan La Liga 3 leh Champions League 4 te a tel.

Ram tan pawh ropui takin a khel a, kum 2018 World Cup-ah khan France a champion pui bakah, Nations League pawh a lakpui bawk. France tan game 93 a khel bawk a ni.

Kum 2023 August thla khan an inkhel hnem lutuk chu player te tan a hlauhawm thu Varane hian a lo sawi tawh a, a sawi ang ngeiin ani pawhin a tuar ta a ni.