Rangers-in Amad Diallo an lalut

27th January 2022, 11:01PM

Scottish club Rangers chuan Manchester United winger Amad Diallo chu tun season chhung atan loan-in an lalut fel.

Nikum January thla khan Atalanta atangin United hian Diallo hi an lei a, a manah pound maktaduai 37.2 lai an seng a, competition zawng zawngah kum 19 mi hian United tan game 9 chiah a la khel a, goal khat a khung tawh.

Rangers hian season tawpah Diallo lei theihna an nei lova, United hian a inchher hriam theih nan loan-in an chhuah tir a, nipui bazar hunah loan-a an chhuah tir dawn leh chhuah tir dawn loh chu an la rel leh dawn a ni.

Rangers a zawm chungchang sawiin Diallo chuan, “Season tawp thleng atan Rangers tana ka khel thei tur hi a lawmawm ka ti a, club lian takah ka career-a hun pawimawh tak ka hmang tur hi ka tan a tha em em a, chona lian tak a ni a, kawng hrang hranga ka in enchhin theihna tur pawh a ni.

“Ka team mate thar te bula training zawm hun ka nghakhlel tawh a, Inrinnia kan supporter-te hmuh hun pawh ka nghakhlel tawh hle a ni,” tiin a sawi.

Rangers winger Ianis Hagi chu a khup an zai avangin tun season-ah a inlan thei tawh dawn lova, hemi avang hian Rangers manager Giovanni van Bronckhorst chuan winger lakluh tur dap nghalin, Diallo hi an lalut ta a ni.

Copyright © inkhel.com 2022. All rights reserved.