Arsenal manager Mikel Arteta chuan England goalkeeper Aaron Ramsdale aia David Raya a thlan chhan a sawi.
Raya hian Pathianni zana Everton an hneh tum khan inkhel bul a tan a, Goodison Park-a inkhelah hian si khat faiin an chak. Gunners hian nipui transfer hunlai khan Brentford atangin an hawh a, lei zui theih hisapa lalut an nih avangin an lei mai a rinawm.
Ramsdale hian season liamta Premier League-a game 38 an khelhah goal a veng vek a, Three Lions coach Gareth Southgate pawhin rinrawlah a hmang char char tawh. Everton an hnehna inkhela a awl hian titi a ti tam a, Arteta hnuaiah a tla tlum lutuk tawh lo tih thawm a awm.
Hemi chungchang hi sawiin Spanish manager chuan, "Gabriel Jesus a luh loh tumin Fabio Vieira emaw Eddie Nketiah emaw kan chhawr a, hetiang chiah hi a ni mai. Jesus-in inkhel bul a tan tam chhan leh, a teammate-te aia hlawhtlinna a chan hnem tawh zia ka sawichhuak ngai lova, engtiklai mahin ka player-te ka khaikhin ngai lo. Position pakhata khel turin player tha tak tak pahnih ka nei a, khel loa awm tir ka thei ngang lo.
"Team tana tha tur tiin theihtawp kan chhuah tlang a, a ruala luh vek theih anih loh avangin bench-a thu an awm a tul. Goal veng thei pawh pahnih pathum kan kawl a, Raya, Ramsdale leh Karl Hein-te niin game khatah an khel vek thei lo. Rintlak tak vek an nih angin khelh ve an phu a, pakhat a khelhloh avangin boruak chhia a awm ta e tihna a nilo." tiin a sawi.
Arsenal hian 2016-17 season hnuah a vawi khat nan tun season-ah Champions League an khel dawn a, Nilaini zan hian group stage-ah PSV Eindhoven an mikhual ang. Arteta hian Ramsdale leh Raya-te a inchhawk chho zel dawn tih pawh a sawi a, Gunners a enkawl tirh khan game laklawh laiin goalkeeper thlak a tum fo thin tih thlengin a sawi.
Kum 41 mi chuan, "Khelh laklawh laia goalkeeper thlak hi thil chin than a ni lova, keipawhin ka thlak ngam lo fo tawh. Tlarhmaa awmte erawh duh dan danin ka siksawi thei a, defender panga hman a tul chang pawhin ka hmang mai zel. Tih fuh lo tumin ka thinur thei em em a, insiamthat dan tur nasa takin ka ngaihtuah zui thin.
"Goalkeeper-te hian inkhel an thlak danglam thei a, goal sual chhuaktu nilo mahse goal venghimtu tha tak an ni. Tunah chuan tute pawh an hlim tlang a team nuam ti lo an awm lo. Khelh phu vek an nih avangin luh tir an uiawm a, hun lo la kal leh zel turah pawh kan la inthlak kual zel ang." tiin a sawi.