October ni 20, Zirtawpni tlai khan Mizoram Premier League Season 6 phase 2 Round 9 Dinthar FC leh Ramhlun North FC ten an khel a, Ramhlun North FC chuan 2-1 in Dinthar FC an hneh a, Ramhlun North forward Lalrinfela chu Man of the match-ah thlan a ni.
Ramhlun North FC tan Lalrinfela chuan goal khat a khung a, Malsawma Chhangte chuan an lamah a ti goal bawk. Dinthar FC tan Jackson Victor Ogheneochuko chuan goal khat a khung ve bawk.
Phase 1 Round 2-ah team pahnih te hi inhmachhawn tawhin Ramhlun North FC hian 2-1 in hnehna an chang tawh a, an intawn vawi hnihnaah pawh results a danglam chuang lo.
Dinthar FC 1-2 Ramhlun North FC
(Jackson Victor Ogheneochuko 33') (Lalrinfela 36', Malsawma Chhangte OG 59')
Dinthar FC hian an coach thar Vanlalrova an la lut a, an match hnuhnung ber Lungleiah hnehna chang zui nghal mahse Ramhlun North FC lakah an tlawm chhunzawm nghal. Khelh tawhah vawi nga tlawm tawhin vawi hnih draw neiin vawi hnih hnehna an chang thung a, point 8 nei mek a ni.
Ramhlun North FC hian coach Samson Ramengmawia hnuaiah an match hnuhnung ber Lungleiah Bethlehem Vengthlang FC an hneh hnuah Dinthar FC an hneh leh bawk. khelh tawhah point 11 nei tawhin table-ah pangana an hauh rih a ni.
Inkhel tan a ni a, Dinthar FC chuan inkhel thunun zawkin goal thunna huntha pawh an nei hmasa zawk a, Liberian striker Jackson Victor Ogheneochuko chuan Ramhlun North FC keeper Liansangpuia chiah a hmachhawn hnuah goal ban a pet per hlauh.
Ramhlun North FC pawhin goal thunna huntha nei ve bawkin Lalrinfela chuan Dinthar FC keeper Malsawmdawngzela tan hna hautak a siam lo. Dinthar FC chuan minute 33-ah goal an khung a, Ramliana penalty hlawh chhuak chu Liberian striker Jackson Victor Ogheneochuko khungin si khat faiin hma an hruai.
Ramhlun North FC chuan counter attack-a nawrin 36-ah Remruata ball pek tha zet chu Rinfela chuan box-ah la lutin an siphurh sutna goal a thun a, goal luh belh loin 1-1in chawlh lawk an hmang.
Second half-ah Ramhlun North FC insiam thain inkhel an thunun thung a, minute 59-ah mual veilam sir atanga Muanawma ball vawrh luh tha zet chu Dinthar FC defender Malsawma Chhangte chuan an lamah a tauh lut hlauh a, Ramhlun North FC chuan 2-1 in hmaanhruai ta.
Ramhlun North FC chuan goal thun belhna hun tha an nei zui a, Liansanga leh PC Vanlalhmangaihzuala pet tha zet chu Dinthar FC keeper Malsawmdawngzela chuan a dan sak ve ve.
Hun tawp dawnah Dinthar FC chuan an siphurh sut ngei tumin Lironthung Lotha luh tir mahse danglamna erawh a thlen thei tawh lo a, hun tawpin a nang zui ta a ni.
Ramhlun North FC hian October ni 23, Thawhtanni tlai dar 3:00-ah Mizoram Police FC an hmachhawn ang a, zan dar 7:30-ah Dinthar FC hian Chhinga Veng FC an hmachhawn thung ang.
Reporter : PC Lala