Ramhlun North FC chuan Mizoram Premier League season 6 bul an tan tha hle, an match hmasa berah an khingpui an inhnehtawkpui hnuah an match hnihnaah Dinthar FC an hneh.
September ni 7, 2017 zan khan AR Lammualah Ramhlun North FC chuan 2-1 in Dinthar FC an hneh a, R. Lalthantluanga chuan Dinthar FC hma hruaipui mahse Malsawma Chhangte chuan an lamah a ti goal palh hlauh, Ramhlun North FC chuan an siphurh an rulh phah a, second half-ah Rosangliana chuan Ramhlun North FC chakna goal khungin; 2-1 in Ramhlun North FC chuan hnehna an chang ta a, he inkhelah hian Ramhlun North FC midfielder Lalramzauva chu Man of the match-a thlan a ni.
Ramhlun North FC 2-1 Dinthar FC
(Malsawma Chhangte 42' OG, Rosangliana 57') (R Lalthantluanga 15')
Ramhlun North FC XI: Lalramzauva Khiangte, Malsawmtluanga Ralte, Lalremruata, C Ramdinmawia, Liansangpuia, Lalrinfela, Lalmuanawma, Lalfelpuia, Rosangliana, Laliansanga, Harry Delona Morris Jr
Dinthar FC XI: Jackson Victor Ogheneochuko, Clarence Carter Ezebube, Joseph Lalthafela, Lalbiakzuala, Malsawma Chhangte, R Lalthantluanga, Samuel Laltlanthanga, Lalnunsanga, Stephen Lalnunmawia, Malsawmdawngzela, Lalnunpuia
Goal hmasa ber hi 15 mins-a lut a ni a, Joseph-a free kick pet tha zet chu box chhunga lo awm R. Lalthantluanga chuan a tauh goal, Dinthar FC chuan hma hruai mahse first half tawp dawnah Malsawma Chhangte hmangin Ramhlun North FC chuan an siphurh an rul a. Ramdina ball vawrh luh tha zet chu Malsawma chuan an lamah a tauh goal hlauh a, half time a nih chuan 1-1 a ni.
Second half tan atanga reilote chhungin Ramhlun North FC chuan Rosangliana hmangin goal an khung leh, Lalrinfela free kick tha zet chu Dinthar FC goalkeeper Mala chuan a save per, hemi per hi Rosangliana chuan a pet goal ta a, hei hi an chakna goal a ni ta a ni.
Ramhlun North FC hian Liberian midfielder Harry Delona Morris Jr. chu an chhawr a, ani hian team a ti phuisui hle. Nigerian forward Jackson chu MFA Disciplinary chuan hremna an hlih sak vangin Dinthar FC tan a inlan thei bawk.
Ramhlun North FC tan Harry chuan goal khungna chance tha tak a nei a, Lalramzauva pawhin chance tha tak a hlah bawk. Huntawp dawnah Dinthar tan Lalbiakhlua chuan an siphurh sutna hun tha nei mahse goal kham a pet per hlauh a, Ramhlun North FC chuan goal dang an chhuah belh ta lo hlauh a ni.
Ramhlun North FC hian Setember ni 14, Ningani zan dar 7:30-ah Chanmari West FC an hmachhawn leh ang a, Dinthar FC hian September ni 15, Zirtawp tlai dar 3:00-ah Chanmari FC an hmachhawn thung ang.
Reporter : PC Lala