John Obi Mikel chuan ram tana inkhelh a tum tawh loh thu puangin, 2019 Africa Cup of Nations-a pathumna an nih hnu lawkah chawlh a tum thu hi a puang a ni.
Nigeria chu 2019 Africa Cup of Nations-ah pathumna an ni a, hemi hnu lawkah hian an captain John Obi Mikel chuan ram tana khelh zui a tum tawh loh thu hi a puang a. Egypt rama tournament an khelhah hian Mikel chu inhliam vangin a tal buai angreng hle a, group stage-ah pawh vawi hnih chiah a khel ve a, Burundi leh Madagascar nen an inkhelhah chiah a tel a ni.
Chelsea player hlui Mikel hian August 2005 khan Libya hmachhawn turin ram tan a khel tan a, Super Eagles tana player pawimawh berte zinga mi a ni chho a. Ram tana a khelh chhung hian FIFA World Cup-ah vawi hnih a tel hman a, Africa Cup of Nations ah chuan vawi 4 ngawt a tel hman a. Cup of Nations-ah hian Nigeria chu 2013 khan a champion pui a, kuminah bronze medal a lakpui bawk a ni.
Mikel chuan, “Egypt ram hi bul ka tanna niin, ram tana ka hun tawp ka hmanna a ni leh chiah bawk,” a ti.
“2006 kumah khan ram tana inelna pangngai ka khelh hmasak ber tum a inher chhuak a, 2019 African Cup of Nations chu ram tana ka inlan hnuhnun ber a ni a, Super Eagles tana khelh zui hi ka tum tawh lo a ni,” a ti bawk.
A sawi zelnaah, “Ram tan chuan 2003 khan ka khel tan a, khami kumah khan Under-17 World Cup-ah ka tel a, kan ram tana khel tura min ringtute chungah lawmthu ka sawi a. Khawvel huap inelnaa hun min siamsak avangin kawng thui zawk ka zawh thei a ni,” a ti.
“Khawvel hmuh theiha min pho chhuah zarah ka thiamna te chu zau zawkin miin an hriat theih phah a, tun dinhmun hi ka thlen theih phah hial a. Kum 32-a upa ka ni ve tawh a, ram tana khelh hi duhtawk a hun ve tawh a, kum lama naupang zawkte tan hmun ken hi a tha ka ti,” tiin John Obi Mikel chuan a sawi.
“Tlema thalai zawkte zarah Africa Cup of Nations 2019 ah khan bronze medal kan lak theih phah a. An zarah Nigeria pawh dinhmun sang takah an la awm chho zel thei dawn tih hi ka ring tlat a ni,” a ti bawk.
“Nigeria tantute zawng zawng chungah lawmthu ka sawi a, kan ramin min rin ngam avangin lawmthu ka sawi mawlh mawlh a, kum 15 chhunga dawhthei leh hmangaih taka min tawiawm chhoh zel avangin ka lawm tak meuh a ni,” tiin a sawi.
Africa Cup of Nations an khelh lai khan John Obi Mikel chuan Turkish Super Lig club Trabzonspor a zawm a, 2019-20 season chhungin Ogenyi Onazi leh Anthony Nwakaeme te nen an khelho dawn a ni.