Kumin kum tawpah FIFA World Cup chu Qatar-a khelh a ni dawn a, tum dang ang bawkin kumin World Cup-ah pawh player langsar tak tak inlan lo tur an awm.

A hnuaiah hian kumin World Cup-a player kan hmuh loh langsar zual 10 tarlan a ni.

Erling Haaland-

Manchester City leh Norway striker hi tunlaia goal khung thei ber te zinga mi a ni a, tun season-ah pawh club leh ram tan a che tha hle. Haaland hian World Cup qualifiers game 10-ah Norway tan goal nga khungin, a ram tan hian goal 21 khung tawh mah se, a ram hi World Cup khel turin a inpet tlinpui zo lo.

Mohamed Salah-

Play off-ah Liverpool forward Salah hian a ram Egypt tan Senegal lakah penalty a hlah a, Egypt hian kumin World Cup an khel dawn lo. Kum 2018 World Cup-ah pawh khan inhliam avangin Salah hi a inlan mumal tawh lova, World Cup khel tur hian kum li tal a nghah leh a ngai dawn a, World Cup lehah kum 34 a ni ve tawh dawn a ni.

Luis Diaz-

Liverpool forward Diaz hi kumin World Cup-ah kan hmu dawn lova, World Cup play-off ah Colombia chuan Peru an pha lova, qualifiers-ah Diaz hian Colombia tan goal 3 a khung a ni.

Martin Odegaard-

Kumin World Cup-ah Arsenal captain Odegaard kan hmu dawn lova, Odegaard hi Norway captain a ni bawk a, mahse a ram hi kumin World Cup khel turin a inpet tlinpui zo lo.

David Alaba-

Austria-in World Cup play-off semi-final ah Wales an hneh loh avangin, Real Madrid defender Alaba hi World Cup-ah kan hmu dawn lova, Austria hian kum 1988 hnuah World Cup an la khel leh lo a ni.

Franck Kessie-

Season hmasa khan Kessie hian Serie A-ah AC Milan champion pui mah se, a ram Ivory Coast chuan qualifiers second round group stage an paltlang zo lova, Barcelona midfielder thar hian kumin World Cup a khel thei dawn lo.

Gianluigi Donnarumma-

Tunlai goalkeeper tha ber zinga mi Donnarumma chu World Cup-ah kan hmu dawn lova, PSG keeper hian Euro 2020-ah Italy champion puiin, Player of the Tournament lawmman dawng bawk mah se, Qatar World Cup khel turin a ram a tlinpui zo ta lo a ni.

Victor Osimhen-

Nipui bazar laia club lianin an ngaihven rawn Osimhen hian World Cup khel turin Nigeria a inpet tlin pui zo lova, Napoli hitman hi Qatar-ah kan hmu dawn lo.

Alexander Isak-

Sweden tlarhmaa Zlatan Ibrahimovic thlaktu Isak pawh Qatar-ah kan hmu dawn lova, Sweden hian play-off final-ah Poland hneh lovin, World Cup khel turin an inpet tling zo lo.

Marco Verratti-

PSG midfield innghahna Verratti-a’n World Cup a khel lo tur hi a uiawm hle a, Euro 2020-ah ropui takin Italy champion mah se, Verratti leh a thiante chu kumin World Cup khel turin an inpet tling zo lo a ni.