Tun hnaiah PUBG Mobile chu a lar chho hle a, he mobile game hi kheltu an pun mai bakah, khel ve ngai lote thlengin a hming an hre bel tawh viau hlawm a. Khawvela mobile game siam chhuah zingah chuan sum hai lut hnem ber niin, world record thar a siam thei a ni.

PUBG Mobile developer te chuan update thar an tih chhuah apiangin thil thar an belh tel zel a, he game kheltute tan a phurawm lehzual a. Heng thil thar an dah belh thin hian a kheltute a hip bakah a game khelh pawh a tinuam zual ve zel bawk a. Hetianga thil tih vel an thiam em vang te pawh hi a nih hmel a, a hmelhriat tawh vek vek chuan an zawngchhang thei hle.

Developer te’n update an dah thar berah chuan Deathmatch mode a awm bakah Godzilla theme te pawh a awm tel a. Hetiang thil thar vang hian a khel thinte chu an phur thar leh viau a, a khel thar pawh an pun belh ve zel bawk.

Thla 6 chhung chauhin PUBG Mobile hi khawvel hmun hrang hrangah mi maktaduai 400 vel zetin an download tawh a, a download tu hi an la pung chho zel bawk a. May thlaah ringawt khan PUBG Mobile hian $146 million zet chu a hui lut thei niin Sensor Tower chuan an sawi.

Heti taka PUBG Mobile game a hlawhtlin chhoh takah chuan developer dangte leh film industry te hial pawhin he game developer Tencent chu thil tihpui atan an sawm ta nual a. Thawmhnaw thar leh mode thar siam kawngah te thawhhopuia sawmtu an awm nual tawh a, PUBG Mobile crossover langsar zualte chu Mission Impossible, Resident Evil 2 leh Godzilla The Monster King te an ni.

Sensor Tower-in an zir chian dan chuan ni tin mi maktaduai 50 chuang zette chu Erangel, Miramar, Sanhok emaw Vikendi emaw velah an zuangthla thin a. Ni khatah hian maktaduai 50 chuangin PUBG Mobile hi an khel ziah angin an chhut bawk.

Anmahni Discord server-ah PUBG Mobile chuan tun hnaiah khan thu chhuah an siam a, “PUBG Mobile player te hi ram pakhata awm vek ni ta se, khawvela ram lian pathumna kan ni thei ang. He game khel thin zawng zawngte zara hetiang dinhmun kan din theih avangin in zavaia chungah lawmthu kan sawi e,” an ti.