Paris Saint-Germain chuan Kylian Mbappe chu 2018-19 season atan jersey number thar an pe a, PSG hian Mbappe hi No. 7 an chantir.

Kum 19-a upa France star Kylian Mbappe hian a hma chuan No. 29 a ha thin a, kuminah chuan 7 haktir an titlu a. Kylian Mbappe number thar hi PSG chuan Twitter leh Instagram lamah pawh an puangzar nghal a, video siamin hashtag #K7LIAN an hmang a ni.

An video siamah hian Mbappe chuan a kut veilam chu 7 angin a tikawm a, hei hi a goal thun lawmnaa a hman chhoh an rin phah a. He video hian thupui a keng tel a, ‘FU7URE IS NOW’ tih a ni.

Kylian Mbappe hian AS Monaco-ah No. 29 a ha thin a, Paris Saint-Germain lama a insawn hnuah pawh 29 hi a hak chhunzawm zel a. France tana a khelh chuan No. 20 leh No. 12 te a ha thung a. Kumin Russia rama World Cup khelh zawh takah kha chuan No. 10 a ha a, France No. 7 chu Antoine Griezmann chuan a ha a ni.

January thla khan Lucas Moura chuan Paris Saint-Germain chhuahsanin English club Tottenham Hotspur a zawm a, hei vang hian No. 7 hi tumahin an ha zui ta lo a. A hmain Ludovic Giuly leh Brazil forward Christian te pawh he number hi an lo chang tawh thin a, a hatu an awm lo remchang bawk nen, Kylian Mbappe chanpualah hian an dah ta a ni.

Mbappe hian Andriy Shevchenko, Raul, David Beckham leh Cristiano Ronaldo te hnung a zui ve ta a ni.