Paris Saint-Germain chuan FC Porto atangin Portuguese midfielder Vitinha an lalut a, kum nga daih contract an ziahpuia, PSG hian Vitinha manah hian euro maktaduai 40 vel an seng niin BBC chuan a tarlang.

Vitinha hi tun nipui bazar a PSG player lei thar pahnihna niin, a hma in PSG hian season liamta a loan-a an kawl Nuno Mendes chu Sporting Lisbon atangin an lo lei nghet tawh bawk a ni.

Kum 2020-21 season khan Premier League club Wolves chuan Vitinha hi loan-in an lo kawl tawh a, Wolves tan kum 22 hian vawi 22 khelin, goal khat a khung a, Wolves hian a ngheta lakluh zui theihna nei mah se, an lalut ta lo.

Season liamta khan Porto-ah kirin Vitinha hi a khel tha hle a, Portuguese club tan hian competition hrang hrangah vawi 47 inlanin, Porto hi Portuguese league bakah domestic cup-ah an champion bawk.

Vitinha hi Porto academy chhuak a ni a, kum 2011 atang khan Porto academy-ah a awm tawh. Portugal U17, U18, U19 leh U21 tan te a khelh hnuah, Vitinha hi kumin atang khan Portugal senior team lamah a inlan tan a, a ram tan hian game 3 a khel tawh a ni.