Ligue 1 champion Paris Saint-Germain chuan Mallorca atangin Lee Kang-in an lalut a, Lee hian PSG-ah hian kum nga daih contract a ziak.

South Korean attacking midfielder hian kum hnih hnuah Mallorca hi a chhuahsan a, season liamta khan Mallorca tan hian La Liga-ah game 36 khelin goal 6 a khung.

Lee chuan, “Paris Saint-Germain ka zawm thei hi a lawmawm ka ti hle a, khawvela club lian ber zinga mi a ni a, khawvela player tha ber ber te an kawl bawk. He ka zinkawng tharah hian bul ka tan chak tawh hle a ni,” tiin PSG a zawm chungchang a sawi.

Kum 22 mi hi tun nipui bazar chhunga PSG player lakluh palina a ni a, PSG hian Lee hma hian Manuel Ugarte, Milan Skriniar leh Marco Asensio te an lo lalut tawh a ni.

Lee-a manah hian PSG hian euro maktaduai 22 an seng niin chanchinbu mite chuan an tarlang a, Lee-a contract hian kum 2028 June thla thleng a daih.

Lee hian kum 2011 khan Valencia academy a zawm a, kum 2018 khan Valencia senior team tana a game hmasa ber a khel a, kum 2021 khan Mallorca in free transfer in an lalut.

Lee hi South Korea U20 leh U23 player hlui a ni a, kum 2019 atang khan South Korea senior team-ah awm tanin, a ram tan hian game 14 a khel tawh a, South Korean player PSG tana khel thei hmasa ber a ni dawn a ni.