Ligue 1 champion lai Paris Saint-Germain chuan, Inter Milan defender Milan Skriniar lakluh an tum ruh hle a, bid thar thehlut turin French club hi an inbuatsaih mek niin Italian chanchinbu te chuan an tarlang.

Inter hian Slovakian centre-back manah hian euro maktaduai 70 an duh niin chanchinbu te chuan an tarlang a, PSG hian euro maktaduai 70 tling lo hret hian dawr leh an tum nia sawi a ni.

Thla hmasa khan PSG hian Skriniar-a man atan euro maktaduai 60 an lo thehchhuak tawh a, hei hi Inter hian lo hnawlin, PSG hi an la beidawng duh lo.

Inter manager Simone Inzaghi chuan an defender hi chelh ngei duh hle mah se, euro maktaduai 70-a dawrtu an awm chuan, Inter hotu te chuan an lo hnar phal a rinawm lova, PSG hian eng zat chiahin nge an dawr dawn a la sawi theih loh.

Kum 27 mi hi Chelsea nen pawh sawizawm an ni a, mahse Chelsea erawhin midang an melh mek a, PSG hian chuhpuitu an nei lo niin a lang a, Skriniar pawh hian Paris-a input luh a hreh a rinawm loh hle bawk a ni.