Paris Saint-Germain chuan an player hlui Christopher Nkunku chu German club RB Leipzig atanga lei let leh an duh tih 90min chuan a tarlang.

Beisei anga an chet theih loh avangin French heavyweight PSG hi kumin nipui bazar inhawn hunah inlak that an tum hle nia sawi a ni a, player lakluh an tum tam tak zingah an academy chhuak Nkunku hi a tel ve ngei niin a lang.

First team lamah Nkunku hian PSG tan game 80 dawn a khel hman a, kum 2019 khan Leipzig hian an lalut a, kum nga daih contract ziahpuiin, kum 24 mi hi Leipzig player pawimawh tak a ni mek.

Leipzig hian Nkunku manah hian pound maktaduai 10 vel bak an seng lova, tunah French midfielder hi Europe-a attacking midfielder naupang langsar ber zinga mi a ni a, PSG hian lak let leh dan an ngaihtuah mek nia sawi a ni.

PSG hi season kal mekah an khelh that tawk loh avangin an supporter-te pawh an lung a awi lo a, an player te an ‘boo’ khum ta zeuh zeuh a, nipui bazar inhawn hunah PSG hian position hrang hrangah player thar an lakluh nual a rinawm a ni.