Sunday zan khan Ligue 1 season thar khuh hawnna inkhel Trophee des Champions khelh a ni a, Ligue 1 champion Paris Saint-Germain leh Coupe de France champion lai Nantes te inhmachhawnin, PSG hian hnehna an chang.

Trophee des Champions hi England-a FA Community Shield nen a inang viau a, Ligue 1 champion lai leh Coupe de France champion ten Ligue 1 season thar tan hmaa an khelh thin a ni.

Kumin Trophee des Champions-ah hian PSG hi 4-0 laiin an chak a, hei hi Trophee des Champions-a PSG an chak vawi 11-na a ni.

PSG tan hian Brazilian forward Neymar chuan goal a khung bakah, Lionel Messi leh Sergio Ramos te chuan goal khat ve ve an thun bawk.

PSG hian a tir atangin inkhel an thunun nghal a, ball possession hi 85% lai nei mah se, Nantes lamin a tir 20mins chhungin chance tha zet vawi hnih an nei a, Ludovic Blas leh Moses Simon te chuan chance tha tak tak an hlah ve ve.

Mahse, Messi chuan 20mins chuang hret an khelhin PSG hma a hruaipui a, veilama ball keng Neymar chuan Messi hi through ball pe in, Messi hian box chhung atangin goal a khung zui a, inkhela goal hmasa ber a lut.

Half time hma lawkin PSG hian an goal hnihna an khung a, box pawn deuh lawkah Moussa Sissoko chuan Neymar titluin Brazilian forward hian free kick a hlawhchhuak. Neymar hi hi freekick atang hian mawi zetin goal-ah ball a thlawh lut a, 2-0 in first half a tawp.

Darkar khat an khelh tlin hma deuhin Ramos chuan PSG tan goal a khung ve leh a, Marco Veratti chuan mawi takin Pablo Sarabia tan ball a chip a, Sarabia hian Ramos pe in, Real Madrid captain hlui hian goal-ah a lo back-heel a, si thum faiin PSG-in hma an hruai.

80mins velah Neymar chuan penalty hlawhchhuakin, a penalty hlawhchhuah hi Neymar hian goal-ah a chantir chhunzawm bawk a, PSG hian nuamsa takin hnehna an chang ta a ni.