Paris Saint-Germain chairman Nasser Al-Khelaifi chuan Lionel Messi sawi angin an khawsa lo tih a sawi.

Messi hian 2022 FIFA World Cup an chawi hnuah club atangin lawmpuina leh chawimawina a dang lo tih kar hmasa khan Migue Granados a hrilh a, Argentina squad-a awm zingah amah chiah lawmpui dawng lo awmchhun a ni tih a sawi. Paris-a kum hnih a awm chhungin a hlim lo tih pawh a sawi lang a, club atanga lawmpuina a dawn loh avangin a lungawi lo hle.

Kum 36 mi chuan, "Argentina squad-ah khan player 25 kan awm a, club atanga lawmpuina dawng lo awmchhun chu keimah chiah ka ni. He thil avang hian ka thinur hran lova, a chhan chu an trohpy kawllai kan chhuhsak vanga thinrim anni tih ka hria." tiin a sawi.

Argentina captain thusawi hian titi ati tam khawp mai a, Kylian Mbappe nena an inkar pawh a tha vak lo tih thawm a awm. A thusawi vanga PSG demtu an tam avangin Al-Khelaifi a tawngchhuak a, tute nge dik zawk tih hriat a har ta hle.

Football Espana-in an kawmnaah Al-Khelaifi chuan, "Video hmangin kan lawmpui tih kan tarlang a, training-na leh a hranpain lawmna hun kan nei. French club kan nih angin mipuite mar kan deh thiam a ngai a, khelmuala lawmna hun siam chi niin kan hre lo.

"Final-a an hneh tak ram hi kan zah thiam a ngai a, club tana a khelhpuite leh kan fans an tam avangin ualau taka lawmna hun siam thei kan nilo. Kan lawmpuina kha a duhtawk lo anih chuan tih theih kan nei lova, lawmpui lo tawp kan nilo tih hi ka sawi duh." tiin a sawi.

Ballon d'Or vawi sarih dawng tawh hi 2021 nipui lai khan a thlawnin an lalut a, an lakluh tirhin boruak nei lian viau mahse a tlatlum thei tak tak lo. Nikir thla khan Paris-ah a in bengbel thei lo tih a sawi a, an fan-te nen an inkarah khi a awm reng tih a sawi tel bawk.

Parc des Princes-a kum hnih a awm chhungin Ligue 1 vawi hnih la mahse, an duh ber Champions League an chawi thei lova, kumin nipui tir lam khan chhuahsanin United States a pan. PSG tan hian intihsiakna hrang hrangah game 75 khelin goal 32 a khung a, midang tih goal tur vawi 35 a siamsak bawk a ni.