Manuel Ugarte chuan Paris Saint-Germain a zawm dawn ta nge nge niin a lang. PSG leh Chelsea te khan Sporting midfielder hi an inchuh a, kar liamta mai khan Chelsea an inhnukdawk ta a ni.
Kum 22 mi Ugarte chu a man a to reuh dawn hle, release clause 60 million Euro vel a nei niin The Athletic chuan a tarlang.
West London club Chelsea pawhin Uruguayan hi hlawh tha tawk tak pek an tiam, hetih lai hian a release clause a san em avangin Blues chu an inhnukdawk ta niin L'Equipe chuan a tarlang a nih kha.
Ugarte hi midfielder la naupang leh tha tak a ni a, PSG midfield nasa takin a tihchak theih a rinawm. Montevideo khaw club Fenix-ah bul tanin, Famalicao tan a khel chhunzawm a, Portugal a pan ta a ni.
Lionel Messi chuan PSG a chhuahsan dawn ta a, ani rual hian Sergio Ramos pawhin Paris club a chhuahsan dawn. PSG hian nipui bazar inhawn hunah team thuamthat chu an hna hmasa tur a ni dawn.
Manuel Ugarte leh Real Madrid chhuahsan tur Marco Asensio chu an lak hmasak tur niin Fabrizio romano chuan a tarlang.
Ligue 1 no mawi chawi mah se, Christophe Galtier pawh PSG chuan an thehchhuak dawn tih a chiang tawh a, Bayern Munich-in an ban tak Julian Nagelsmann chu PSG manager thar ni tura rinkai a ni.