Inrinni zan Premier League match-ah top 3 hoin an khingpui an hneh vek a, table chung lamah thil danglam a awm lo.
Liverpool chuan si khat faiin Crystal Palace an hneh a, Arsenal chuan 3-1 in Southampton an hneh a, Manchester City pawhin 3-2 in Fulham an hneh bawk.
CRYSTAL PALACE 0-1 LIVERPOOL
Selhurst Park-ah hmahruaitu Liverpool an leng lut a, inkhelh tantira Jota goal hmangin si khat faiin Liverpool hian Crystal Palace an hneh.
He match-a goal awmchhun hi minute 9-a lut a ni a, mual veilam sir atanga Gakpo cross chu Jota chuan awlsam takin a chhuih lut.
Liverpool chuan an khingpui te hi an hneh hle, ball posessions 68% an nei a, shots vawi 16 an neih laiin, an khingpui lam erawh chuan shots vawi 9 chiah an nei.
Palace lam pawhin goal hlauhawm an nei ve tho a, Sarr shot tha tak chu Becker chuan tha lutukin a lo dan sak a, Eze leh Nkeitiah te tha taka a dan hnuah Alisson Becker a inhliam hlauh mai, Liverpool tan chuan a pawi hle a ni.
MAN CITY 3-2 FULHAM
Etihad Stadium-ah Manchester City chuan Fulham an mikhual a, mikhual lamin goal khung hmasa mah se, City tan Kovacic a chetha a, goal hnih khungin, Doku pawhin goal khat a khung a, Pep Guardiola leh a naute hi 3-2 in an chak.
Inkhelh tan atangin mual neitu lamin an nawr na hle a, mahse minute 20 an khelh tlin hmain Traore chuan chance tha lutuk a nei, goal khungna hun tha tak nei mah se, City goalkeeper Ederson chuan a lo dang.
Minute 26-ah mikhual team-in goal an khung. Jimenez chuan tha lutukin a kheng, hei hi hnai set sawt atangin Pereira chuan a chhuih lut. Fulham lam hian hma an hruai rei lem lo.
Minute 32-ah City chuan corner an pet a, Fulham lamin an clear hla thei lo. Penalty spot vel atangin kawh zetin a chhuih a, defender lamin an lo dang kawi bawk nen, a goal chiang hle. Half time a nihin team hnih te 1-1 in an inhnehtawk.
Second half tan a ni a, minute 47-ah Kovacic chuan City hma a hruaipui. Bernardo Silva ball pek tha tak chu box pawn chiah atangin kawh zetin a chhuih goal a, City chuan 2-1 in hma an hruai ta.
City lamin nawr viau mah se, Fulham counter a hlauhawm thei hle. Walker leh Traore te inum zet kha zawng, a pui miah miah. Traore chuan defender tlan chak Walker a tlan pel, goalkeeper chiah a hmachhawn tihin a shot a, hei hi Ederson chuan a lo dang.
Minute 82-ah Doku chuan mual veilam sirah ball chak takin a tlanpui a, a lai lamah a la lut. Box pawn chiah atang chuan kawh kawi zawt khawpin a chhuih a, a va han goal chiang tak em.
Fulham lam an beidawng mai bik lo, hun tawp dawn minute 2 a la awmin mual dinglam sir atanga Nelson cross chu Muniz chuan a chhuih goal ve leh a, 3-2 in Manchester City chuan hnehna an chang ta a ni.
ARSENAL 3-1 SOUTHAMPTON
Emirates Stadium-ah mikhual Southampton lam pawhin goal khung hmasa zet mah se, Havertz, Martinelli leh Saka ten an chhang let a, Arsenal chuan 3-1 in hnehna an chang.
Ramsdale chu Emirates Stadium-ah a kir leh a, Arsenal fans lamin ropui takin an lo lawm, English goalkeeper hi a mittui a tla hial nghe nghe.
First half-ah goal a lut lo a, second half minute 55-ah mikhual lamin goal an khung hmasa. Fernandes chuan tha lutukin ball a vawrh, hei hi Archer chuan umin, box veilam sir a thlenpui hnuin bottom corner-ah a chhuih lut.
Saints hian hma an hruai rei lo. Minute 58-ah Saka ball pek tha lutuk chu Havertz chuan changin, box chhung a thlenpui vel chiah tihin a shot a, goal post a per hnuin a goal mawi hle.
Minute 68-ah mual dinglam sir atanga Saka cross tha tak chu far post-a lo chang Martinelli chuan angle zim tak kar atangin a chhuih goal. He goal hi VAR hmanga ennawn ngial a ni a, goal-a pawm a ni chhunzawm ta a ni.
Hun tawp dawn minute 2 a la awmin an chakna tichiang turin assist vawi hnih neitu Saka chuan goal a khung ve a, box dinglam sir atangin lei hrulah kawh zetin a chhuih goal. 3-1 in Arsenal chuan hnehna an chang ta a ni.
Top 3 te hian game 7 khel tawhin, Liverpool chuan point 18 an hlawhchhuak a, hmahruaitu an ni chhunzawm zel. Man City chuan dawtin, point 17 an nei a, pathumna Arsenal pawhin point 17 an nei bawk.