Manchester City chuan 2020-21 Premier League title an la ta a, anmahni hnaih bertu Manchester United chuan Old Trafford-ah an mikhual Leicester City 1-2 a an hneh loh hnua title la thei hi an ni.
Pep Guardiola leh a pawlte hian April thlaah khan Wembley-ah Tottenham Hotspur chu 1-0 in an hneh a, League Cup an lo la tawh bawk a. League Cup leh Premier League trophy an kawl tawh a, UEFA Champions League title la thei dinhmunah an la ding mek bawk a ni.
Sulhnu nei tha tak mai Pep Guardiola hi Robbie Savage chuan Premier League huanga manager tha ber niin a sawi a, Manchester United manager hlui Sir Alex Ferguson ai pawhin a dah chungnung zawk a ni.
Premier League title an lak theihna kawngah Guardiola pawlte chu chak theih zatah te, game tina point hmuh hnem kawngah te, goal thun hnem lamah te leh goal chhuah tlem lamah te an chungnung hlawm a ni.
Match 187 khelhah Guardiola kaihhruaina hnuaiah hian Manchester City chu vawi 138 an chak thei a, an chak theih zat chu 73.8% niin, 67.1% record nei Antonio Conte leh 65.2% record nei Sir Alex Ferguson te chuan an pha lo hle.
Game tina point hmuh zat chawh rualah pawh Guardiola hi a chungnung ber a, an khingpuite nen vawi 23 an inhnehtawk a, chuti chung chuan game tinah point 2.34 hmu zel ang a ni a. Sir Alex Ferguson chu pahnihnaah awmin, game tinah point 2.16 hmu zel ang a ni a. Antonio Conte chu pathumnaah a awm a, game tina point 2.14 hmu zel ang a ni bawk.
League champion lo ni ve tawh zingah Jurgen Klopp chuan game tinah point 2.09 a hmu a, Roberto Mancini chuan point 2.05 hmuin, Jose Mourinho chuan point 2.02 a hmu bawk a. Arsene Wenger khan point 1.96 a hmu a, Carlo Ancelotti chuan point 1.86 a hmu a, Manuel Pellegrini chuan point 1.77 hmuin, Kenny Dalglish chuan point 1.7 a hmu a, Claudio Ranieri chuan point 1.68 a hmu bawk a ni.
Guardiola chu game tina goal thun theih zatah pawh a sang ber a la ni leh zel a, game tinah goal 2.43 zel thun ang an ni a, hei bakah hian goal venghim tha zinga chungnung ber niin, game tina goal 0.8 chhuah zel anga chhut an ni.
Robbie Savage chuan Pep Guardiola hi a fak hle a, “Pep Guardiola hian player te a tuai hriam a, a kaihhruaina hnuaiah hma an sawn nasa thei hle a, an team pawh an ropui viau reng a ni,” a ti.
“Ka tan chuan Pep Guardiola tluka Premier League huanga manager tha hi an la awm lo a, ka mita ka hmuh ve phak chinah phei chuan a la ropui ber a ni,” a ti bawk.