Inrinni zan Premier League match-ah hmahruaitu Manchester City chuan Newcastle United an inhnehtawkpui a, Liverpool chuan Wolves an lo hneh ve bawk si nen, Liverpool chu Premier League hmahruaitu thar an ni ta.

St. James' Park-ah mikhual Manchester City lamin hma an hruai, minute 35-ah Grealish-a ball pek chu box veilam sir atangin mawi lutukin Gvardiol chuan far post lamah a chhuih lut.

Second half tir lamah mual neitu lamin penalty an hlawhchhuak. City offside thang a per lo, Gordon chuan chak takin ball a tlanpui, box chhungah Ederson a bum a, ani hian Gordon a lo titlu chhunzawm bawk.

Referee Jarred Gillett chuan penalty a ham a, penalty hlawhchhuaktu Gordon chuan goal-ah a chantir, team hnihte 1-1 in an inhnehtawk ta a ni. Man City hian an midfielder tha pahnih Rodri leh De Bruyne te inkhelh theih loh an tuar hle a, a zawnin Premier League match-ah hnehna an chang zo lo ve ve ta.

Arsenal chuan Emirates Stadium-ah 4-2 in Leicester City an hneh. Gunners hian Foxes hi an inhnehtawkpui teuh hle. Minute 90 a nih thlengin 2-2 a ni a, mahse hun pekbelhah Arsenal hian goal 2 an khung ta a ni.

First half-ah Martinelli leh Trossard te hmangin Arsenal chuan si hnih faiin hma an hruai. Ngaih tha taka an awm laiin second half tir lamah Justin chuan Foxes tan goal hnih a rawn khung ve ta mai.

2-2 a ni ngar ngar a, hun tawp dawn tak takah Trossard thawhrah chu Ndidi chuan an lamah a ti goal a, Havertz pawhin an chakna tichiang turin goal khat a khung ve leh a, 4-2 laiin inkhel a zo ta a ni.

Khelh 6 atangin Arsenal hian point 14 an hlawhchhuak a, Manchester City nen an point a inang a, goal difference-ah City hi goal khatin an chungnung zawk chauh a ni.

Stamford Bridge lamah Cole Palmer a vul hle, Premier League record thar a siam a, first half-ah goal 4 lai a khung a, he a goal hi Chelsea chakna a ni chhunzawm ta bawk a ni.

Rutter chuan tan atanga minute 7-na lekah Brighton tan goal a khung. Palmer chuan minute 21-ah Chelsea siphurh a rul a, Sancho penalty hlawhchhuah chu minute 28-ah khungin, 2-1 in Blues hma a hruaipui.

Minute 31-ah free kick atangin mawi lutukin Palmer chuan a chhuih goal leh, hemi hnu lawk hian Baleba chuan Brighton tan goal 1 a khung ve leh a, 3-2 in Chelsea-in hma an hruai.

First half tawp dawnah Palmer chuan Jadon Sancho through ball tha lutuk chu box veilamah changin, mawi takin a chhuih goal leh a, 4-2 in Chelsea chuan hnehna an chang ta a ni.

Maresca hnuaiah Chelsea-in harh tharna an chang mek a, tun season Premier League game 6-ah vawi 4 hnehna an chang a, vawi khat an khingpui an inhnehtawkpui a, vawi khat an tlawm. Goal khung hnem ber ni mekin, goal 15 an khung tawh a, goal 7 an chhuah tawh bawk a ni.

Inrinni zan inkhel hnuhnung berah Liverpool chuan 2-1 in Wolves an hneh a, Reds tan Konate chuan first half tawp dawnah a tauh goal. Second half tir lamah Liverpool tlarhnung an talbuai, hetih lai hian Nouri chuan goal a khung a, Wolves siphurh a rul.

Hemi hnu deuh lawk hian Reds chuan penalty an hlawhchhuak a, he penalty hi Mo Salah chuan goal-ah a chantir a, 2-1 in Liverpool chuan hnehna an chang ta a ni.

Salah hian tun season Premier League game 6 a khelh tawh atangin goal contributions vawi 8 lai a nei tawh bawk.

Arne Slot leh a hote an che thei hle, tun season Premier League game 6 atangin vawi 5 hnehna an chang a, vawi 1 chiah an tlawm. Point 15 an hlawhchhuah a, Premier League hmahruaitu thar an ni ta a ni.