Tun nipui bazar inhawn laiin Premier League club te chuan player thar lei nan £2billion chuang sum an seng tawh. Transfer window hi September ni 1-ah khar a ni dawn a, hemi hma hian transfer ngaihnawm deuh deuh a la thleng nual dawn a ni.
Premier League club te hian player lei nan sum an seng hnem tawh hle, a bik takin club lian hoin sum an thehchhuak hnem a. The Premier League's profit and sustainability rules (PSR)-in a phuar theih hlawm dawn avangin player hralh tur an nei ve nual. Chung te chu thlir chho ang aw.
CHELSEA
Chelsea head coach Enzo Maresca khan Ningani khan Nicolas Jackson leh Christopher Nkunku te chu hralh an tum thu a sawi chiang. Nkunku hian Stamford Bridge-ah kum 4 daih contract a la nei a, Jackson pawhin kum 2033 thleng contract a la nei bawk.
Nkunku hi RB Leipzig lamin an ngaihven leh mek a, Jackson pawh Premier League club thenkhatin an ngaihven nia report a ni. Tun nipui bazarah Chelsea hian Joao Felix (Al Nassr), Petrovic (Bournemouth), Ugochukwu, Broja (both Burnley) leh Veiga (Villarreal) te an lo thehchhuak tawh a, Disasi, Sterling leh Chilwell te hralh an la tum mek a, David Datro Fofana leh Tyrique George pawh an chhuah rin a ni.
MANCHESTER UNITED
United head coach Ruben Amorim chuan Garnacho, Sancho, Malacia leh Antony te chu a game plan-a an tel ve tawh loh thu a sawi chiang a, anni ho hi hralh an tum mek. Garnacho chu Chelsea lamin an ngaihven a, amah pawhin Chelsea pan a duh hle bawk. Hetih lai hian a man chungchangah inremna an la nei thei lo.
Marcus Rashford chu Barcelona lamah loan-in an kaltir tawh a, Sancho chu AC Milan lamin ngaihven mah se, indawrna a kal thui tak tak thei lo. Old Trafford-ah a hlawh a tam si a, club dang a zawm chuan a hlawh a hniam duai duai dawn. Hei vang hian player thenkhat hi chuan Old Trafford chhuahsan an hreh hle nia report a ni.
RB Leipzig atanga Benjamin Sesko an lei hnuah Manchester United chuan Rasmus Hojlund chu hralh an pawiti tawh lo. Fulham nen an inhmachhawn pawh khan squad-ah telh a ni tawh lo bawk a, Napoli lamin loan-a hawh an tum mek a, inremna an nei dawn hnai nia report a ni.
ARSENAL
Tun nipui bazar zet chu Arsenal pawh an bazar nasa leh pek hle. Player thenkhat an thehchhuah ve nual a ngaih dawn hmel. Hralh an tum zingah Oleksandr Zinchenko, Albert Sambi Lokonga, Reiss Nelson leh Fabio Vieira chu an tel niin The Athletic chuan a tarlang a ni.
An goalkeeper Karl Hein chuan loan-in tun season chhung atan Werder Bremen a zawm a, an la inthehchhuak nasa lo deuh a, kar khat chhung hian player thenkhat chu an chhuah a rinawm.
LIVERPOOL
Premier League club zinga tun nipui bazara sum hmang hnem ber chu Liverpool an ni. Anni hian player thar lei nan £300million vel an hmang tawh. Hetih lai hian an thehchhuak hnem ve tho mai.
Tun nipui bazar inhawn laiin Darwin Nunez (Al Hilal), Luis Diaz (Bayern Munich), Jarell Quansah (Bayer Leverkusen) leh Ben Doak (Bournemouth) te chu an chhuahtir tawh. Tin, Real Madrid lamah Trent Alexander-Arnold an kaltir a, fee £10m vel an ei ve bawk.
Liverpool hian Kostas Tsimikas chu chhuahtir an tum leh mek a, Greece left-back hian European football-a inkhelhna hmun a chan tam theihna tur pan a duh nia report a ni.
MANCHESTER CITY
Burnley lama season 2 chhung ngawt loan-a an kaltir tawh hnuah James Trafford chu Etihad Stadium-ah a kir leh. An backup goalkeeper Stefan Ortega chu chhuahtir an phal nia tarlan a ni.
Tin, an number 1 goalkeeper Ederson chuan chhuah a duh a, Galatasaray nen an indawr mek. Defender Manuel Ajanji pawh a chhuah dawn hmel bawk a, City hian thehchhuah tur an nei tam lo hle.